رحلات اليوم الواحد لـ«معرض الكتاب»: يا تيجى معانا.. يا نشترى لك
صورة أرشيفية
شغفهم بالقراءة واهتمامهم بالتعرّف على الثقافات المختلفة، وحرصهم على حضور حفلات التوقيع لبعض الكتاب، جعلهم يبادرون بعمل رحلات لمدة يوم واحد من محافظة الإسكندرية، إلى القاهرة، لحضور فعاليات معرض القاهرة الدولى للكتاب فى دورته الـ49، من خلال الاتفاق مع بعض الشركات الخاصة لتوفير أوتوبيسات، مع وضع برنامج للرحلة، على أن يكون المعرض هو المكان الرئيسى لليوم، وتتراوح أسعار الرحلة بين 85 و100 جنيه. «المعرض، وشارع المعز، والحسين»، ثلاثة أماكن ضمن برنامج وضعه محمد سعيد، من محافظة الإسكندرية، للرحلة التى يستعد لها لزيارة المعرض، تبلغ قيمة الاشتراك بالرحلة 85 جنيهاً، ويوفر أوتوبيساً مميزاً للزائرين من حيث الراحة، مع وجود التكييف الهوائى: «هنوصل المعرض على 10 الصبح، وهنقعد فيه لحد الساعة 5، وبعدين هنطلع على الحسين والمعز، نقعد لحد 9 بالليل ونروّح». خدمة أخرى يوفّرها «محمد» لكل من يتعذّر عليهم زيارة المعرض لظروفه الخاصة: «اللى ماعرفش يسافر معانا بيكتبوا لى ورقة بالكتب اللى عايزينها، وأنا فى المعرض هاجيبها لهم كأنهم زاروا المعرض بالظبط». التاسعة صباحاً هو الميعاد الذى حدّده رافى عادل، أحد منظمى الرحلات للمعرض: «إحنا حريصين أن أغلب الوقت نكون جوه المعرض من بدرى». بعد قضاء جولات حرة، يتّجه الزائرون مع «رافى» إلى أحد المولات، وتبلغ قيمة الرحلة 100 جنيه: «الرحلة كده رخيصة جداً، المفروض سعرها كان بـ130 جنيه، بس أنا قاصد تبقى بسيطة علشان الناس تتشجّع وتيجى معانا».
إحداها تشمل 3 أماكن «المعرض والحسين والمعز» باشتراك 85 جنيهاً.. والأخرى تتضمّن جولات حرة فى عدد من المولات
أغلب المشتركين بالرحلة تتراوح أعمارهم بين 28 و38 عاماً، كما تضم الرحلة بعض مؤلفى الكتب، الذين يستعدّون لحفل توقيع الكتب الخاصة.
«بقالى 10 سنين باجمع أصحابى وباروح معاهم المعرض، لحد ما لاقيت رحلات من إسكندرية بتروح المعرض، ودى بتبقى أحسن فى الوقت والتنظيم».. حسب محمد العبادى، أحد زوار المعرض: «مهما كان اللى هيبقى فى المكتبات اللى عندنا، بس معرض الكتاب أوسع فى الثقافة المحلية والعالمية وهالاقى فيه اللى أنا عايزه».