فساتين من قماش المراتب والستائر: نجّدنى شكراً
أزياء مصنوعة من أقمشة التنجيد.. احدث صيحة في الموضة
الخروج عن المألوف فى عالم الأزياء، أصبح هو الأسلوب المتبع حالياً لتحقيق الاختلاف الذى يشغل بال الفتيات المهووسات بالموضة، واستخدام أقمشة الستائر والتنجيد، فى تفصيل فساتين السهرة، صار هو الصيحة الأحدث والأغرب فى الوقت نفسه، ووجد إقبالاً كبيراً من قبل بعض الفتيات الراغبات فى الظهور بصورة مختلفة وأنيقة.
صيحة جديدة فى عالم الأزياء لجأت إليها بعض الفتيات لمجرد الاختلاف
«أنا كنت رايحة أشترى قماش عادى، شفت قماش التنجيد، لقيته عجبنى وتخيلت شكل الفستان فيه».. هكذا اختارت أسماء سمير، خامة مختلفة، وهى قماش التنجيد لتصنع منها فستاناً أنيقاً يجعلها تبدو كالأميرات، وذلك على الرغم من انتقاد البعض لها: «فى الأول قالولى الفستان مش هيطلع حلو، وكل ما أقول لحد يقولى انتى مجنونة عايزة تعملى فستان من قماش التنجيد!».
لــم تلتفـت «أسماء» للتعليقـات السلبية، واستكملت خطوتها، واختارت الاكسسوارات الخـاصــة بالفسـتان وعندما ظهرت به أمام عائلتها وأصدقائها، نال إعجاب الجميع: «اشتريت متر القماش بـ70 جنيه، وما قولتلوش إنى هفصله فستان عشان التجار لما يسمعوا سيرة تفصيل بيغّلوا علينا السعر». استخدمت نحو 6 أمتار من القماش، وبعد نجاح تجربتها الأولى، قررت أن تكررها: «طلع أرخص من الأقمشة اللى بنجيبها لتفصيل الفساتين السواريه».
«كل زمايلى فى الأتيليه، قالولى مش هتعرف تعمله، وهيطلع وحش جداً وبلاش تجازف بسمعتك فى التفصيل»، تحدى أحمد رجب، أحد مصممى الأزياء، هؤلاء المحبِطين، بالعمل أسبوعاً كاملاً لإنتاج تصميم مختلف ومتميز للفستان: «أهم حاجة ثقة الزبون، طول ما هو بيثق فيا، بيخلينى أصمم أحسن حاجة عندى، حتى لو هشتغل ليل مع نهار»، على الرغم أنه فى مهنة التصميم منذ 12 عاماً، فإنه يستخدم قماش التنجيد للمرة الأولى فى التفصيل: «قبلت إنى أعمل الفستان ده عشان ما بحبش الروتين، وطول الوقت بدوّر على أشكال جديدة أعملها».
«لازم البنت اللى تلبس القماش ده يكون خفيف عليها عشان حركاتها، وتختار اللى يناسب أنها تقدر تخرج به».. هذا ما قالته مها بركة، ستايلست، فأنواع أقمشة التنجيد من الأنواع الثقيلة التى تتطلب جهداً كبيراً لتصميمه، وكذلك للتحرك به: «فيه أقمشة دلوقتى شبه قماش التنجيد بالظبط، ممكن نستخدمها، لكن مش تنجيد وبتدّى نفس نفشة الفستان اللى عايزينها».