بريد الوطن| ماطلعش نبى
صورة تعبيرية
مفيش غيرى وقف عريان
فى صف الأوليا
من غير عصا تتقلب حية
ولا كف إيد أبيض بكام آية
ولا حوت يقرب من الشط برواية
ولا النار هتبقى برد وسلام
ولا حد راح يآمن بدينك المزعوم
ولا هتقوم القيامة من غير علامة
إبليس نجح لما عصى
لحظة سجود الملايكة
وكان فاكرها استقامة
والليل واخد بإيد صبحه الكفيف
والحلم فوق رف الأمانى سخيف
والأغانى سلالم فوق حيطان اليأس
وبكرة اللى مش طالع
قالع حبابى عينيه م الرقص
مفيش غيرى وقف عريان
فى صف الأوليا
ولا شق بحر وعدا زى الأغبيا
أو مات فى عصر الأوفيا
أو كان فى يوم م الأوليا
أو كان فى يوم
م الأوليا..
أشرف الشناوى
شاعر عامية - البرامون
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com