سنين بتعدى وسنين بتجرى من الألفية الأولى وحتى الألفية اللى إحنا عايشين فيها، وحتى الثانية اللى بتقرأوا فيها الكلام اللى أنا كاتباه ده، والولاد بتخدع وتلعب بمشاعر البنات.
يااااه!
زمن طويل ومفيش حاجة بتتغير من أيام أفلام زمان، و طبعاً من أشهرها فيلم "دعاء الكروان" اللى أخذنا منه أشهر جملة تمثل معاناه البنت المخدوعة فى حبها "هنادى راحت فى الوبا"، وفضلت سيدة الشاشة العربية فاتن حمامة أو "آمنة " يا عينى توجع فى قلبها طول الفيلم علشان تثبت إن العيب مش فى البنت لوحدها، وإن ممكن أى رجل يخدعها بالكلام الجميل، حتى إنه فى آخر الفيلم وقعت فى حب البشمهندش اللى كانت نفسها فى أول الفيلم تحطل له سم.
وطبعاً مش ده الفيلم الوحيد اللى كان له هدفين؛ إنه يحذر البنت من الوقوع فى الخطأ ويحذر الرجل من أنه يخدع البنت، كان فى أفلام كتير، ولحد اللحظة اللى إحنا فيها دى فى مسلسلات وأفلام بيكتب فيها جزء كبير من السيناريو عن قصص الحب الفاشلة اللى لازم تكون فيها البنت مخدوعة وبتتفاجأ إنه وقت الجد مش عايز جواز.
طيب بعد كل ده ليه البنات مش بتتعلم؟!
ليه مش عايزة تفهم إنه فى فرق بين إنه بيقول لها دى فترة تعارف وبين إن دى سنين بتعدى من عمرهم؟!
ليه ميبقاش فى صراحة فى العلاقة من الأول؟!
والسؤال الأهم من كل ده.. هى الرجالة والشباب اللى بيعملوا كده مازهقوش؟! ده حتى الموضوع بقى موضة قديمة.
- آه والله، ليه الرجالة ماتحطش نفسها مكان البنت وتحس بالجرح العميق قوى اللى بتعمله فى قلبها لما يعشمها بعلاقة مش عارف نهايتها، وممكن يكون عارف بس هقول نفس الجملة الشهيرة "بيتسلى لحد لما ماما تجيب له عروسة مؤدبة ماعرفتش حد قبله!".
خلاص بقى.. كفاية..
لو احكى لكم عن كمية الوجع اللى بشوفه فى بوستات البنات على مواقع التواصل الاجتماعى، حاجة تحزن إن بعد قمة التكنولوچيا اللى بقينا بتستخدمها فى حياتنا كل يوم نلاقى الولاد لسه بتكذب على البنات وتعشمها.
غيروا من نفسكم واعملوا وقفة كدة واسألوا مخكم سؤال واحد "هل نفعكم الكذب فى العلاقات العاطفية؟!".
يعنى مثلاً بقى معاكوا فلوس كتير؟
خلصتوا كل المشاكل فى حياتكم؟
نجحتوا نجاح باهر فى شغلكم، جامعتكم، أبحاثكم ومشاريعكم؟!
الإجابة طبعاً هى لأ، طيب ما نغير علشان نتغير للأحسن
اعرف البنت وخليها أختك، ولو حسّيت بمشاعر من ناحيتها عرفها وعرف أهلك وأهلها، وماتخفوش، أهلها مش هيقفشوا لأن زى ما قلنا فوق الزمن اتغير، بالعكس هتكبر فى نظرهم حتى لو العلاقة ماكملتش
بلاش تكذبوا
بلاش تعشموا
بلاش تدوا لنفسكم حق الخداع باسم الرجولة
وفى الآخر أتمنى لكم لقب رجل وزوج محترم أفضل بكتير من الـ EX
ريهام عادل رشدي