محمد صبحي عن واقعة "الراقصة في المدرسة": الخطأ أنهم جابوا فرقة من بره
راقصة مدرسة ليسيه الحرية
علق الفنان محمد صبحي على واقعة إحياء راقصة شعبية لحفل تكريم المتوفقين بمدرسة "ليسيه" الخاصة: "فاكر المدرسة اللي عملت حفلة وجابت الأطفال اللي بيمثلوا الدواعش بيدبحوا في الناس إزاي وقالوا بس إحنا بنعيد محاكاة الواقع وأطفال في ابتدائي ولابسين جلاليب وماسكين سيوف وبيقتلوا بعض وكده".
وأضاف خلال مداخلة هاتفية مع الإعلامي وائل الإبراشي في برنامج "العاشرة مساء" المٌذاع عبر فضائية "دريم": "أنا مختلف مع آراء كتير اتقالت والمسألة اختيار وإحنا خطأ إننا نتمسك بأخطاء سابقة أو أجيال سابقة عاوزين نطبقها النهاردة وخطأ إننا نحاول العودة للوراء ونتأخر والخطيئة ما بين الإفراط والتفريط والمدرسة أخطأت في شيء إنها جابت فرقة".
وتابع: "مصنع أو شركة او ناد يجيب فرقة من برة وارد لكن المدرسة هي الفرصة الوحيدة للإبداع لأنه نوع من أنواع التربية بجانب التعليم وهذه هي الفترة التي يخرجوا من حقل التعليم إلى المتعة ماذا نقدم لهم هل نجيب لهم فرقة أو أراجوز ولا نطلع أطفالنا وأولادنا هما اللي يقدموا الإبداع ده وإحنا نسقف لهم ويلبسوا فلاحي ويعملوا فنون شعبية ويرقصوا شعبي ويرقصوا غربي ويمثلوا".
وأضاف: "إحنا كانت مدرستنا وإحنا في ابتدائي كانت الحفلة كانت فقرة الشاعر والمونولوج وفقرة تمثيل وفقرة رقص وفقرة موسيقى كل ده اللي بيعمله الطلبة مش فرقة جاية زي فرقة الأورج والعازفين وراقصات أيًا كانوا مع احترامي وأنا مش ضد ده لكن أنا بتكلم على الاختيار، والإدارة اختيار وأنت تجبر أولياء الأمور أنه يشوف بنته مكان البنات دول معتقدش أنه كان هيتضايق".
وتساءل: "أنا فرجتهم على إيه وإيه اللي استفادوا منه كمتعة بصرية؟".