سكان «ناهيا» يواجهون السرقات بكاميرات المراقبة

11:04 م | الأربعاء 07 مارس 2018

حوادث السرقة المتتالية لم يجدوا لها حلاً سوى قيامهم بتعليق لافتة مكتوبة بخط كبير بعرض الحائط تحمل عبارة «احترس الشارع مراقب بالكاميرات»، ظناً منهم أنها رادعة للصوص. العبارة وجد فيها أهالى شارع أحمد الشريف بمنطقة ناهيا التابعة لحى بولاق الدكرور حلاً للتخلص من قلقهم على أنفسهم وبضائعهم وأطفالهم، ومنهم رشوان أحمد، بائع خضار فى الشارع، الذى ظل طيلة الفترة الماضية مصاباً بالقلق على بضاعته التى تتم سرقتها يومياً: «جربت كل الطرق والخضار كان برضه كل يوم بيتسرق.. كنت باخسر فى أكل عيشى».

لم تكن هذه الكاميرات كما توقع أهالى المنطقة رادعة للصوص، ولكنهم أصبحوا متمكنين من رؤيتهم وتحديد ملامحهم: «شفنا واحد من كام يوم فك موتور من عربية وماحدش لحد دلوقتى عرف يمسكه ولا الشرطة وصلت ليه»، وتعد الحسنة الوحيدة على حد قول سكان الشارع من تركيب الكاميرات هى بُعد متعاطى المخدرات والبرشام عنه والخوف من الوقوف فيه: «البرشامجية واللى بياخدوا إبر استحالة ييجوا الشارع، بيخافوا يتصوروا، ودى تعتبر حسنة بتحسسنا بالأمان على العيال الصغيرة والستات فى الشارع».

الصيدلية الموجودة فى الشارع ومعمل التحاليل تعرضا لأكثر من حادثة سرقة، وتروى إحدى العاملات فى معمل التحاليل: «المخزن كان بيتكسر ويتسرق.. المنطقة عندنا مش أمان أصلاً من ساعة الثورة ما قامت.. أهى اليافطة دى من ساعة ما اتحطت بقينا بنقعد فى المعمل مش خايفين، وخصوصاً البنات فى الشيفت الليلى».