العروسة للعريس.. و«فيشار وغزل بنات وشيكولاتة» للمعازيم

09:37 م | الجمعة 09 مارس 2018

أطعمة تقليدية وأصناف بعينها اعتدنا وجودها فى «بوفيه» حفلات الزفاف وأعياد الميلاد، ما دفع البعض لمحاولة التمرد عليها، وإضفاء أجواء من البهجة بإدخال عربات فشار وغزل بنات و«وافل» ونافورة شيكولاتة وجبنة إلى قاعة الاحتفال.

«الناس زهقت من حتة الجاتوه والساندويتش، وأصحاب الأفراح لجأوا للعربيات دى عشان بتفرّح المعازيم، خصوصاً الأطفال»، بحسب فريدة مصطفى، مسئولة عن تأجير تلك العربات فى أحد محال الحلوى، مشيرة إلى تفاوت أسعار تأجيرها وفقاً لعدد الحضور، فعلى سبيل المثال إيجار عربة الفشار، وغزل البنات، والـ«وافل» 1600 جنيه، وتكفى 100 فرد، أما نافورة الشيكولاتة والجبنة لـ100 فرد بـ 1800 جنيه: «عندنا عربيات لعدد 250 فرد بأسعار أغلى، والعربية بتكون كاملة بكل حاجة فيها».

«اختلافك هو سر تميزك فى حفلتك، وهتسبب سعادة ليك ولمعازيمك».. «يلا أجّر نافورتك من الشيكولاتة بالطعم اللى تحبه ليك ولحبايبك»، هى بعض الدعاية التى لجأ لها محل حلوى فى منطقة مصر الجديدة، ويقول يوسف حسن، أحد العاملين بالمحل: «وجودها فى الحفل بيعمل جو مختلف وممتع، خصوصاً نافورة الشيكولاتة. مفيش حد مابيحبش الشيكولاتة، ده لو مش بيحبوها بيتصوروا جنبها».

النمط المختلف لـ«بوفيه» الحفلات ساعد أمجد حازم كثيراً أثناء تجهيزه لحفل خطوبته: «الموضوع بقى سهل وأوفر.. أنا فى حفل خطوبتى أجرت عربية شيكولاتة مع شوية معجنات وباتيهات وبس، وده ريحنى كتير لأن كل واحد بيقوم ياكل اللى عايزه، بدل من الأطباق اللى كنا بنقعد نوزعها على المعازيم وبيحصل فوضى فى الفرح وقت فتح البوفيه»، الأمر الذى لم يقتصر على ذلك: «كمان لفت نظر المعازيم، وأضاف جو من البهجة المختلفة فى المكان، ناس كتير سألتنى عملت كده إزاى وفين وقرروا يقلدونى».