«نجح»: «الجمل بتاعى هو رزقى الوحيد وبعامله زى ولادى»

كتب: أعدت المبادرة وقامت بالجولة: شيرين أشرف

07:21 م | الأحد 11 مارس 2018

لا يستغنى أحدهما عن الآخر منذ سنوات بعيدة، فرزق كل منهما مرتبط بالثانى، فتراهما يجوبان القرية بالساعات بحثاً عن الرزق والطعام والشراب، إلى أن ينهكهما عناء السير، فيتوقفا لالتقاط الأنفاس. «نجح» و«سند» ليسا صديقين بالمعنى المتعارف عليه، وكل من حولهما لا يفهمون أى علاقة يمكن أن تجمع بين «نجح أبوالشوشاو» والجمل «سند»، وما طبيعة المشاعر التى تدفع «نجح» إلى أن يحنو ويطبطب على «سند»، ويتحدث إليه أثناء سيرهما بالساعات، بل ويستقطع بعض أموال أطفاله الـ3 ليشترى طعاماً للجمل.

{long_qoute_1}

«أنا من غرب سهيل نفسها، والناس هنا عندها جمال كتير لأنها أكتر وسيلة مواصلات جوه القرية، ومفيش عربيات كتير جوه عندنا، وكمان مصدر رزق لينا، لأن السياح بييحبوا يركبوا الجمال، وأنا عشقى فى سند مش إنه مجرد جمل بسترزق منه، أنا بحبه زى عيالى ومش بفرّق بينه وبينهم»، قالها «نجح»، مؤكداً أن الجمل «سند» يفهمه جيداً، فهو بحسب وصفه، ذكى ويعرف صاحبه من رائحته، كما أنه يخلص له بشدة: «الجمال بتحس بصاحبها، بس محتاجين اللى يحس بيهم، عشان كده أنا براعى سند مش بس فى الأكل، وفى النظافة كمان، فأنا بحميه كل يوم عشان يكون نضيف وبزيّنه بلبس ألوان عشان يكون مميز ويحس باهتمامى».

من الثامنة صباحاً وحتى المغرب، تمتد فترة عمل الرجل الأربعينى، بالرغم من قلة السياحة والعمل وكثرة المصاريف، وخلالها لا يكون أمامه سوى الصبر والشعور بالأمل للتغلب على الأحوال الصعبة، بحسب وصفه: «الجمل علمنى الوفاء والصبر، ده لما يجوع بحسّه بيسلّم أمره لله ويسكت، وأكتر حاجة بتضايقنى لما بحس إنى قليل الحيلة، وأفضل أحسبها وأنا ماشى لحد ما ربنا يفرجها، لأن الأمل موجود، الدنيا عندنا طبعاً مابقتش زى الأول، لكن فى النهاية لازم يكون عندنا أمل وصبر عشان نتحمل الصعب، والحلو موجود بس اللى يشوفه»، يقولها «نجح»، مؤكداً أن أطفاله الـ3 يحبون «سند» ويلعبون معه ويسألون عنه يومياً.

وبابتسامة يضيف «نجح»: «نفسى الناس يكون عندها أمل أكتر من كده، عشان نقدر نشوف الحلو فى بلدنا، مصر فيها كتير حلو زى ما فيها الوحش، بس إحنا أحسن من غيرنا بكتير، طول ما إحنا بنحاول ومش واقفين فى مكانا».