مواطنون: بدأنا نحس بالأمان وبقى فيه حد بيهتم بينا.. ويجب هيكلة «الصحة والتعليم»

09:32 م | الأربعاء 21 مارس 2018

أشاد عدد من المواطنين بما ورد فى حوار الرئيس عبدالفتاح السيسى، أمس الأول، الذى تحدث فيه عن مشاكل الصحة والتعليم، بالإضافة إلى الأمن والأمان ودور الدولة والمواطن فى تحمل المسئولية، وقال محمود إبراهيم حسين، 47 سنة، أعمال حرة: «من بعد ثورة يناير ماكانش فيه أمان، بس بدأ يرجع تدريجياً لما السيسى بقى رئيس للجمهورية، بدأنا نحس بالتغيير الحاصل، ومابقتش باقلق على بناتى وهما نازلين الشارع، وبقيت مطمن حتى لو الوقت كان متأخر، لكن قبل كده ماكنتش بآمن إنهم ينزلوا لوحدهم حتى لو الصبح».

وأضاف «محمود»: «الحكومة قالت هتحارب الدروس الخصوصية، والطلاب هيلتزموا بالحضور فى المدارس، بس أنا ماشفتش ده، ومطحون فى الدروس، وبقول للمسئولين: ارحمونا من الدروس الخصوصية عشان الدنيا أصلاً غالية، وبنتى فى ثانوية عامة ومابتروحش المدرسة، والدروس خلصت على اللى باقى معانا»، وتابع: «ناس كتير بتشتكى من غلاء ونقص الدواء فبطالب الرئيس يركز اهتمامه على الصحة عشان ممكن نستحمل فى حاجات كتير بس فى الدواء والصحة هيبقى صعب، وأنا شايف إن الشعب بيعمل اللى عليه ومستحمل وبيثق فى الرئيس، وهننزل ننتخب زى ما نزلنا فى الانتخابات اللى فاتت، عشان شفنا مشروعات وعايزينها تكمل، والخطاب بتاع الرئيس جدد ثقتنا فيه زى الأول وأكتر».

{long_qoute_1}

وعبر أحمد شعبان عبدالغنى، 58 سنة، عامل نظافة، عن استيائه من سوء الخدمات الصحية المقدمة، مناشداً الرئيس عبدالفتاح السيسى بزيادة الاهتمام بها، وأضاف: «ابنى كان تعبان وعنده الزايدة والمستشفى ماهتمتش بينا والدواء كان ناقص ولفينا عليه كتير عشان نلاقيه، ولولا ستر ربنا كانت الزايدة انفجرت وابنى مات»، واختتم حديثه بالمطالبة بزيادة رواتب عمال النظافة بقوله: «إحنا أقل ناس بتقبض وبناخد 1500 جنيه وباطلب من الرئيس يهتم بينا وبمشاكلنا ويزود مرتبنا».

وأعرب عبدالله عبدالرؤوف، 28 سنة، عن إعجابه بخطاب الرئيس عبدالفتاح السيسى وتطرقه للمشاكل والتحديات التى تواجه الشارع المصرى وقال: «الشعب عمل 20% بس من اللى عليه ولسه فى كتير لازم الشعب يعمله، ومن جانب الحكومة لازم يكون فى رقابة صارمة على كل مؤسسات الدولة عشان نمنع الرشاوى والفساد ونحس بالتغيير اللى الرئيس اتكلم عنه، واللى كلنا بنطالب بيه وتتحقق أمنياتنا فى إننا نعيش فى مصر خالية من الفساد»، وأضاف: «الصحة بدأ يحصل فيها تغيير حتى لو بطىء ومحتاجين نصبر عشان نشوف النتائج لكن التعليم مافيهوش تغيير خالص بسبب إن رجال الأعمال دخلوا فى مجال التعليم، والمدارس الخاصة بتاخد كل فلوسنا، وده بيشكل مشكلة كبيرة».

وقال سيد شحاتة: «منظومة الصحة والتعليم محتاجة اهتمام كبير وإعادة هيكلة من أول وجديد بسبب الفساد والسرقة اللى بتحصل من زمان وما زالت مستمرة لحد دلوقتى، وبطالب الرئيس إنه يهتم بيهم بشكل أكبر عشان من غير الصحة والتعليم البلد مش هيبقى ليها وزن ولا قيمة»، وأضاف: «الأمان بقى أحسن من الأول طبعاً وبندعم الرئيس فى جهوده العظيمة، وبالنسبة للأسعار أنا بطالب إنها ترخص شوية عشان المواطن البسيط يقدر يعيش فى ظل الظروف الحالية».