بريد الوطن| أنا نملة
بريد الوطن| أنا نملة
أنا عايشة نملة
بلم حبات الدفا لبرد الشتا
وأخزن الشمس اللى تايهة
ف الخريف متشتتة
واتغطى بالحلم اللى باقى م الربيع
وأنام وانا متكلفتة
أنا زى كل النمل بسعى
من إمتى يعنى
فيه نملة عايشة ف جحرها متستتة
بستنى من بق الزمن
كام ضحكة حلوة مسكرة
واجرى عليها وألمها
لو حتى واقعة مكسرة
على أرض حزنى مفتفتة
أنا ماشية جنب الحيط وخايفة
لتكون عنيكم ليا شايفة
وتكون حياتى للبشر
واضحة وصريحة وملفتة
حافظة النظام
واقفة الطابور
عايشة الحياة بأدى دور
أنا مهما كل الكون يدور
على أرضى واقفة متبتة
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
