كورس «تفريغ نفسى» لعلاج المكتئبين: صوّتوا.. عيّطوا.. اصرخوا
صورة أرشيفية
لمواجهة صعوبات الحياة والضغوط النفسية التى ربما تقود إلى الاكتئاب، قرّر 4 أطباء نفسيين، تنظيم دورة تدريبية للمساعدة على التفريغ النفسى، من خلال «البكاء، التخيل، الضرب، الصراخ»، وحسب الدكتور محمود الحسينى، استشارى الصحة النفسية، وأحد المشاركين فى الدورة: «بنستخدم وسائل كتيرة أقربها لقلب أى حد متضايق نفسياً إنه يبوح ويقول اللى عايزه، بس للشخص اللى نفسه يوجّه له ده، بمعنى إننا بنخلى المريض يتخيّل الشخص اللى قدامه ويبدأ يعاتبه، وأحياناً بيوصل لأنه بيصرخ وبيقوم يضرب الكرسى اللى قدامه، مما يساعد أصحاب الضغوط النفسية على الوصول إلى مرحلة كبيرة من الاسترخاء عن طريق تفريغ المشاعر السلبية».
هناك درجة أخرى متقدّمة من الاكتئاب والضغط النفسى، وهى التى يتم التعامل معها من خلال البكاء: نقوم بتحديد الحالات وأماكن وأوقات خاصة بهم للبكاء مدة تصل إلى ساعة، وفى خلال هذه الساعة يتذكر الشخص جميع المشكلات والأفكار السلبية والسيئة التى طالما تراوده وتوصله إلى درجة الضغط النفسى ومن ثم البكاء: «لو الشخص الخاضع لاختبار البكاء فكر فى أى حاجة إيجابية بنوقف الساعة دى فوراً، لأن المخ بيوديه لسكة الهروب وده مش المطلوب، ولو الأفكار الإيجابية زادت جداً عند الشخص ده، أو إنه مش قادر يفتكر حاجة ضايقته، بنوقف الساعة وبنحط له خطة بديلة».
وفى مرحلة أخرى يتم وضع 4 خطط: (ممارسة الرياضة، قراءة كتاب ممتع، الاسترخاء، وأخيراً فعل أى شىء يريده أو محبب إلى قلبه)، ووفقاً لـ«الحسينى» فإن هذه الطريقة تساعد الحالات على الوصول إلى درجة السلام النفسى فى المستقبل بشكل مرن، والتصدى لأى سلبيات أو أمور مزعجة فى حياته.