المسـحراتى
صورة أرشيفية
اصحى يانايم وحّد الدايم
وقول نويت
بكره إن حييت
الشهر صايم
والفجر قايم
اصحى يانايم، وحّد الرزاق
رمضان كريم
مسحّراتى يا مؤمنين
منقّراتى مد الأنين
الله على رعشة الحنين
عمره ما كان الأمل ضنين
يا قدس يا نوارة السنين
كأن عينى فى ميتمى
يا قدس ما يحتمل دمى
إلا أشوفك وأرتمى
وأبوس ترابك المريمى
أبويا وابنى على فمى
ماأتوهش ياقدس فى المطال
يا عاصره مهجة الرجال
سقاك من دمعته الهلال
يا قدس يا سبحة الشقا
الأعمى فى سجدتك رأى
والفجر من صخرتك سقى
يا قدس تتفجر الجراح
والصبر حرب وأيوب صلاح
يا أخت من مكه والبطاح
قلبى انضرب للعرب وصاح
لابد من فتح فى الصباح
المشى طاب لى
والدق على طبلى
ناس كانوا قبلى
قالوا فى الأمثال
الرجل تدب مطرح ما تحب
وأنا صنعتى مسحراتى فى البلد جوال