اعلانات الشراء "اون لاين" في رمضان تكتسح المحلات
"الحقي طقم العيد قبل نفاذ الكمية"، "غيري شكل بيتك قبل العيد بكفارات الأنتريه الجديدة"، "جددي مطبخك قبل العيد بحلل اسعارها ولا في الخيال".. إعلانات "اونلاين" انتشرت في شهر رمضان على موقع التواصل الاجتماعي "فيس بوك"، مرفقة بصور للمنتجات المعروضة، يقابلها تعليقات عديدة وتواصل عن طريق "الإنبوكس"، واقبال على المعروضات غير مسبوق، لشراء المنتجات المعلن عنها "اون لاين" قبل العيد، بعد ان قرر الكثيرين عدم النزول لشراء احتياجاتهم لضيق الوقت.
محمد سالم، واحد من هؤلاء، الذي قرر شراء ملابس العيد لأبنائه الـ3 عن طريق اعلانات "الاون لاين" على "فيس بوك"، فشهر رمضان بالنسبة للمهندس الثلاثيني، صوم وعبادة، فيقول: "كنت في الاول بننزل انا ومراتي من اول رمضان ندور على لبس العيال في المحلات ونتبهدل ونضيع وقت، لا كنت بلحق اصلي التراويح براحتي في الجامع، ولا اقرا قرآن ووقتي كله كان بيضيع في التدوير والشراء، لكن دلوقتي اعلانات الملابس على فيس بوك وفرت عليا كتير"، مستكملاً: "كل اللي بتكلفه ببقى الصبح بدور على لبس يناسب العيال، ودلوقتي على الفيس كل حاجة باقت تتباع، حتى الشربات اشترتها ليهم من على النت، من غير ما انزل واتعب نفسي واضيع وقتي".
ايمان أحمد، قامت بشراء مفارش جديدة لمنزلها قبل العيد عن طريق الاعلانات على "فيس بوك"، في اول ايام رمضان، بدلاً من النزول والبحث في المحلات "عشان اوفر وقتي في رمضان"، بحسب السيدة الاربعينية، فتقول: "وقتي في رمضان بيبقى مشغول في العزومات وعمايل الاكل، ده غير مذاكرة العيال زي السنادي لأن رمضان جاي مع الامتحانات، فقررت اشتري كل اللي بحتاجه من الاعلانات الاون لاين، لأن بحب على دخلة العيد اجدد البيت، واشتريت مفروشات وكفر للانتريه عشان يكون جديد ومشايات وجولي لحد البيت ومتعبتش في حاجة"، مضيفه: "فكرة الاعلانات اللي انتشرت على الفيس دي وبتبيع كل حاجة ليها مميزات كتير جداً، ووفرت لناس كتير زي مجهود التدوير واللف في المحلات، خصوصا ان رمضان وقته قليل جداً".
أمجد فتحي، صاحب أحد الاعلانات المنتشرة على "فيس بوك"، يؤكد ان الاقبال على المنتجات التي يعرضها فاقت توقعاته، وافضل من وقوفه داخل محل لبيعها: "فكرة الاون لاين وفرت على اللي بيبيع حاجات كتير، عشان كده ناس كتير جدا باقت بتبيع على الفيس احسن ما يقفوا في محلات ويبيعوا، لأن على الفيس احنا مش بندفع حاجة وبنوصل للناس، وفي مواسم بقينا نشتغل عليها زي دخلة العيد"، وتابع: "الناس باقت تشتري كل حاجة من قبل العيد بكتير، وفي اقبال كبير والمكسب بيكون الحمد لله صافي وكويس عشان كده شغال اون لاين".
تعليقات الفيسبوك