مسحراتي اليوم الحادى والعشرين
مسحراتي اليوم الحادى والعشرين
مسحراتى
منقراتى
مرة فى حياتى
دخلت سيما
شُفت اللى آتى
كان يا ما كان
حمار حصان
بجوزين حوافر
وجوز ودان
عليه مسافر شجيع جبان
يشف فوقه
ويحدف بطوقه
ويقل ذوقه
عيَان بيان
وحبيبته شقرا
فى إيديها زهرة
فى عينيها زغرة
ودموع كمان
طب سيبنا من دى
سيبها فى أمان
آدى فى الأمام
أحمر وهندى
داهن دهان
أبو عين قوية
بالبندقية
هات يا نيشان
يقتل له مِيّة
ويمضغ لبان
وبعد غيبته
يرجع بخيبته
يحضن حبيبته
شوف الحنان
ودا علم ولّا
دا حلم ولّا
دا فـيلم ولّا
دا شىء جنان
سهرتنا ضاعت
على بضاعة
الأمريكان
كان ليه ندوَّر
فى غير مكان
إحنا اللى نوَّر
فينا الأدان
لازم نطوّر
حواديت زمان
فن الميدان
شعر العروبة
بحر العذوبة
والعنفوان
زى العيدان
نبتت ولادى
فى كل ناحية
باهتف لتحيا
فنون بلادى.
