مروة الشافعى: «البرجر» وش السعد علىّ.. وبناتى أهم من تقديم برنامج

11:11 م | الجمعة 08 يونيو 2018

المطبخ بالنسبة لها مسرح تستعرض به مهاراتها المتعددة فى إعداد الطعام، تترك خيالها ويديها لعمل وصفات شرقية وغربية بلمسة مصرية أصيلة، لم تتخيل يوماً أن تدخل دائرة مشاهير المطبخ، وأن يتابع برنامجها على موقع «يوتيوب» وصفحتها على «فيس بوك» 2 مليون متابع، بعد أن ذاع صيتها عندما قامت بإعداد «برجر» بيتى، بنفس مذاق المحلات الشهيرة. «الوطن» حاورت مروة الشافعى عن برنامجها، الذى أصبحت حلقاته حديث السيدات على مواقع التواصل الاجتماعى.

{long_qoute_1}

المطبخ هواية أم دراسة؟

- هواية بالتأكيد، أنا خريجة كلية تجارة قسم لغة إنجليزية بجامعة عين شمس دفعة 2004.

كيف كانت البداية؟

- قبل الجواز مكنتش بدخل المطبخ كتير، لكن بعد الجواز حسيت بمسئولية تجاه جوزى وبناتى التلاتة تحديداً، بقيت بفكر طول الوقت فى أكلهم، وإزاى أقدر أعمل أكل صحى بنفس طعم أكل الشارع، عشان ميضطروش يجروا على مطاعم بره، وياكلوا من إيدى.

متى شعرت أنك مشهورة؟

- فى يوم وليلة لقيت نفسى مشهورة وناس كتير بتابعنى، كنت بعمل برجر لولادى بنفس طعم ونكهة المطاعم، ونشرت الفيديو بالوصفة على مواقع التواصل الاجتماعى، وفوجئت إن الفيديو انتشر جداً وكان وش السعد، الناس كلها بتتكلم عنى وعن نضافة المطبخ، وبقى عندى 12 ألف متابع فى يومين، وده كان فى شهر مارس 2015، لحد ما وصلت صفحتى دلوقت لأكثر من 2 مليون متابع.

هل تفكرين فى تقديم برنامج تليفزيونى؟

- أكيد نفسى، لكن لو اتعرض عليّا حالياً مش هقدر، لأن بناتى دلوقتى أولى بيّا وبوقتى وجهدى، وبفضل أتواصل مع الناس وأنا فى بيتى.

ما مميزات برامج الـ«سوشيال ميديا»؟

- أحسن بكتير من التليفزيون، ببقى عارفة حجم تواصل الجمهور وردود الفعل فى لحظتها، إنما على التليفزيون مببقاش عارفة حجم المتابعين ومدى رضاهم عن البرنامج.

من شجعك على تقديم برنامج عن المطبخ؟

- جوزى وأمى.

وهل يساعدك زوجك فى إعداد الطعام؟

- جوزى راجل أكيل جداً وبس، محدش بيساعدنى هما واثقين فى كل حاجة أنا بعملها.

هل فكرت فى تأجير مطبخ أوسع لتصوير البرنامج به؟

- كل ست بترتاح فى مطبخها، ومطبخى بيخلينى قريبة من الناس ومفيش تكلف، خاصةً إن مطبخى زى مطبخهم تمام، ويمكن مطبخى أقل من ناس تانية.

هل بالضرورة تكون الزوجة ملمة بوصفات الأكل الشرقى والغربى؟

- مش شرط، بس على الأقل يكون عندها خلفية عن وصفات كتير وتقدر تنوع لأسرتها عشان محدش ياكل بره، ويحبوا الأكل البيتى.

ما أحب وصفاتك لقلبك؟

- أنا بحب أتعلم وأعمل كل حاجة، ومفيش حاجة بتبقى صعبة عليّا طول ما بجربها وبمارسها كتير، لكن المحبب لقلبى قوى الفتة والممبار والكوارع.

وما الوصفة التى يطلبها جمهورك باستمرار؟

- البرجر، باعتباره أكتر حاجة اتشهرت بيها، وكمان أغلب الأطفال بيطلبوه من أمهاتهم، ومن بعده السينابون.

ما نصيحتك لعمل عزومة اقتصادية؟

- أهم حاجة نجيب احتياجات وطلبات العزومة على عدد الأفراد الموجودين، ونستغل عروض التخفيض اللى بتطرحها المحلات، ومانعملش من صنف واحد وصفات كتير.. يعنى مش لازم نعمل من اللحمة صوانى بالبشاميل ونشوحها ونحطها فى الطبيخ، ده تبذير على الفاضى.

ما أفضل نظام غذائى فى رمضان؟

- الإكثار من تناول المياه، والاهتمام بالبروتين سواء نباتى أو حيوانى، وتناول الخضراوات ذات الألياف، وطبعاً تقسيم الوجبة إلى مرتين أو ثلاث يجنبنا الشعور بالتخمة بعد تناول الإفطار.

من الشيف الذى تحلمين بتقديم برنامج معه؟

- غادة التلى، لأنها من أكثر المشجعات لى على السوشيال ميديا، ومن بعدها الشيف طارق إبراهيم، وأسامة السيد.

ومن الشيف الذى استفدت من خبرته فى المطبخ؟

- كل اللى على الساحة حتى اللى مش مشهورين، اتعلمت منهم وضافولى كتير جداً.