«الكحك السورى» ينافس المصرى فى الطعم والسعر.. دوق وشوف

11:26 م | الثلاثاء 12 يونيو 2018

يفترشون الأرصفة بالكعك والبسكويت والبيتى فور، أطباق لحلوى العيد السورى يجد فيها الكثير من الزبائن الحل والمنقذ الوحيد أمامهم من الارتفاع الجنونى فى الأسعار الذى اجتاح المحال المصرية قبل أيام من الاحتفال بعيد الفطر، حيث وصل كيلو الكعك المصرى إلى 120 جنيهاً، بينما السورى من 40 إلى 50 جنيهاً فقط.

خالد محمد، أحد تجار الحلوى السوريين فى مصر، نزح من سوريا إلى مصر منذ 6 سنوات، مهارة زوجته فى تصنيع الحلويات والمعجنات كانت السبب وراء افتتاحه للمشروع الخاص به بحدائق المعادى: «إحنا لا عندنا محل ولا أى حاجة، إحنا بنفرش الأرض وعاملين ستاند فى الشارع، كل اللى يهمنا إننا نفضل مطلوبين فى السوق»، انخفاض أسعار الكعك السورى واحد من أهم الأسباب التى أدت إلى ارتفاع الإقبال عليه: «الناس بيشدها السعر، لكن لو السعر قليل والطعم مش حلو محدش هيشترى حاجة».

تتراوح الأسعار بين 30 و50 جنيهاً للكيلو من الغريبة والبيتى فور والكعك بمختلف أنواعه: «بعمل طبق كيلو مشكل من البيتى فور والسابلية والكوكيز والغريبة، ده عليه الطلب جداً وبيتباع بـ30 جنيهاً بس». وبحسب «خالد» فإن المشروع لم يكلف سوى شراء فرن جيد جداً يناسب طبيعة عمله حتى يسهله عليه: «المشروع ده متعاون فيه أنا وأخويا وزوجتى وزوجة أخويا»، حيث يتم الاستعداد لموسم عيد الفطر خلال آخر أسبوعين من رمضان.

حسام أبومازن، سورى الأصل، يستعد أيضاً لموسم عيد الفطر بطرح علب كعك مشكل مكونة من «كعك وغريبة وبيتى فور»، وتتراوح أسعار العلب بين 25 و50 جنيهاً: «إحنا بنقدم الحاجة اللى فعلاً الزبون بيحتاجها وبالسعر اللى يقدر يشترى به»، ويصف الإقبال خلال الموسم الحالى بالجيد ونسبة الشراء مرتفعة عن الأعوام السابقة: «الحاجة اللى بتميزنا هى الطعم المختلف إحنا أى مشروع لينا للأكل بينجح، لينا سر فى المطبخ، وبنحاول نرضى جميع الأذواق».