1000 جنيه غرامة لمن يلقى زبالة فى العمارة: ما يجيبها إلا «أحمد»

10:17 م | الأربعاء 04 يوليو 2018

«الرجاء عدم إلقاء القمامة فى أى اتجاه من العمارة، لعدم دفع غرامة مالية قدرها ألف جنيه»، هى الفكرة التى توصل لها الشاب أحمد سالم، وفرضها على جيرانه، بورقة وضعها عند مدخل العمارة، كمحاولة لمنع السكان من إلقاء القمامة حول العمارة التى يعيشون فيها، بعد التنسيق مع صاحب البناية المكونة من 5 طوابق وموظفى الحى.

«فيه عادة سيئة موجودة فى كل بيت، الناس بتكسل ترمى زبالتها وبترميها فى المنور أو من البلكونة، ولما فكرت مالقتش عقاب أقوى من إن المخالف يدفع فلوس من جيبه، وبالتالى هياخد حذره عشان مايدفعش فلوس»، بحسب «أحمد»، صاحب الـ25 عاماً.

بالتنسيق مع صاحب العمارة، الموجودة فى حى المناخ بمحافظة بورسعيد، وموظفى الحى، يحاول «أحمد» نشر فكرته فى باقى أنحاء الحى، خاصة بعد أن احترم السكان القرار، ولم يُبدوا أى اعتراض عليه، بعد علمهم أن المبلغ الذى سيجمع سيتجه إلى أعمال الصيانة.

أضاف «أحمد»: «كان لازم أختار مبلغ كبير ومناسب للمستوى المادى لسكان العمارة، عشان مايتسببش فى مشاكل، وفى نفس الوقت يكون مناسب لتصليح أى عطل يحصل فى العمارة». ليست المرة الأولى التى يهتم فيها «أحمد» بالنشاط البيئى داخل محافظته، ففى العام الماضى تطوع مع موظفى الحى لإزالة التعديات ومتابعة شكاوى المواطنين: «عدد محدود اللى بيهتم بالمجال ده رغم أهميته، ودورى كشاب إنى أحافظ على البيئة، وأخلى محافظتى أحسن محافظة، عشان كده نزلت فى شم النسيم الماضى ووزعت شنط على الناس فى الحدائق، وشجعتهم مايرموش مخلفاتهم على الأرض».