«مانجو بالشطة والليمون» فرصة لمحبى الأكل من غير زيادة فى الوزن

11:15 م | الاثنين 16 يوليو 2018

«مانجو بالشطة والليمون»، أكلة ربما يعتقد البعض أنها غير مستساغة، لكن البعض من محبى الدايت وجدوا فيها ضالتهم، فهم يعتقدون أن إضافة الشطة والليمون إلى المانجو، تسهم فى تخليصهم من السعرات الحرارية الزائدة. نيفين يوسف، واحدة من عشاق المانجو اتبعت هذه الطريقة، بعد أن تداولها البعض على مواقع التواصل الاجتماعى: «حابة أوجه تحية وشكر وإعزاز لصاحب ومخترع فكرة المانجا بالشطة والليمون، لأنه خلانى آكل المانجو براحتى من غير ما أحس بندم».

وتحتوى ثمرة المانجو الواحدة على 150 سعراً حرارياً على الأقل: «الليمون والشطة بيعلى من معدل الحرق بنسبة كبيرة، بيقلل من السعرات بتاعتها إلى حد ما، فالواحد مابيزيدش فى الوزن»، وحسب «نيفين» فإن المانجو الهندى هو أكثر الأنواع التى تتلاءم مع هذه الطريقة: «لازم المانجا تكون مسكرة جداً، علشان الطعم بتاع الشطة والليمون يكون باين وليه تأثير والموضوع مايكونش حادق جداً».

طرق أخرى يلجأ إليها محبو الدايت، ذكرت منها «نيفين» طريقة استخدام القرفة حتى تزيد من معدل الحرق: «اللى مش بيحب طعم الشطة والليمون يحط قرفة علشان تعلى الحرق»، وتعد فكرة المانجو بالشطة والليمون مستوحاة من فكرة مخلل المانجو الهندى: «موضوع مخلل المانجا ده اللى إدانا جرأة نجرب المانجا بالشطة والليمون بس مش أى حد يقدر يستطعمها، لازم يكون بيحب الشطة»، منذ اللحظة الأولى التى طرحت فيها «نيفين» الفكرة على أحد جروبات الدايت الشهيرة على موقع التواصل الاجتماعى «فيس بوك» انقسمت التعليقات حول الإعجاب والسخرية: «فيه ناس اتبسطت، لأنها هتقدر تاكل مانجا براحتها، وناس كتير قعدت تتريق على الفكرة، وأنهم هيشتروا مانجا غالية جداً ويبوظوا طعمها بالشكل ده».