أصحاب أراضى وضع اليد «كعب داير» على طلبات التقنين.. والجيزة توقف استقبال المواطنين
مواطنون يتقدمون بطلبات التقنين أمام إدارة أملاك الجيزة
فى الوقت الذى حددت فيه لجنة استرداد أراضى الدولة، الاثنين المقبل، آخر موعد لسداد رسوم فحص ملفات واضعى اليد على أراضى الدولة، شكا عدد من المواطنين من المعاناة بسبب ما وصفوه بـ«الروتين» داخل المصالح الحكومية، مشيرين إلى أنه رغم تسليمهم الأوراق التى طلبت منهم، فإنهم لم يحصلوا على إذن دفع الرسوم حتى الآن، وطالب بعضهم بمد المهلة التى حددتها الحكومة حتى لا يقعوا تحت طائلة القانون بسبب تأخر لا ذنب لهم فيه.
«الموظف بيضيّع حق الدولة وحق المواطن».. جملة بدأ بها عمر على، 49 عاماً، صاحب مكتب عقارى، وخبير تسويق، يقطن بمنطقة التجمع الخامس، حديثه عن معاناته مع موظفى إدارة الأملاك يومياً، وتنقّله بين مكتب الواحات البحرية، ومكتب المحافظة بالجيزة: «بقالى شهرين كل يوم بقطع مسافة 400 كيلو رايح جاى، من الواحات، وبنزين العربية بس بيكلفنى 1000 جنيه وكل ده من غير ما يخلصولى ورقى».
يملك «عمر» مزرعة على مساحة 8 فدادين ونصف الفدان بالواحات البحرية، وتقدم بطلب التقنين بمكتب الواحات البحرية يوم 10 يونيو الماضى، فطلب منه الموظفون هناك الذهاب بالطلب إلى مكتب إدارة الأملاك فى مبنى محافظة الجيزة: «الدولة بتطلع قرارات وبتطلب مننا نعمل اللى علينا، لكن الموظفين هما اللى بيعطلونا وبيتعاملوا مع الموضوع بمنتهى الاستهتار».
مطالبات بمد موعد سداد رسوم فحص الملفات.. وأحد العاملين: الموظفين عندهم شغل كتير.. و«عمر»: بقالى شهرين بخلّص فى الورق
المشكلة التى تواجه «عمر» هى عدم حصوله على أى مستند يثبت أنه تقدم بطلب التقنين حتى الآن: «بياخدوا مننا الطلب، ويقولوا لنا تابعوا معانا لحين الانتهاء من الفحص، وصرف إذن دفع الرسوم، فى البنك الأهلى، ومفيش حاجة بتحصل». وينهى حديثه بالقول: «مفروض يرحموا الناس شوية من الزحمة، ويزوّدوا مواعيد العمل الرسمية، عشان كل الناس تقدر تقدم الطلب». من جانبه، قال أحد أفراد الأمن على البوابة الفرعية لمبنى محافظة الجيزة إن موظفى إدارة الأملاك، ليس لديهم وقت لاستقبال مواطنين يومى الثلاثاء والأربعاء: «الموظفين عندهم طلبات تقنين كتير، عاوزين يخلصوها، وكل يوم بيمشوا متأخر عن ميعادهم بسببها». وأشار إلى أن التقديم وتسلم إيصالات التقديم والدفع، متاح يومى الخميس والأحد فقط: «اللى مقدم طلبات التقنين يقدر ييجى الخميس أو الأحد عشان يستلم إيصال الدفع، والناس اللى ما جتش قدمت طلب التقنين تلحق تيجى اليومين دول، عشان مفيش مهلة تانية، ده آخر ميعاد».
لم يختلف الوضع كثيراً عند حسام الدين هريدى، 53 عاماً، أحد سكان منطقة الجمالية، إذ يعانى من المشكلة نفسها: «اشتريت أرض فى الواحات بمساحة 20 فدان، ورحت أدفع الرسوم عشان ما يجليش قرار إزالة لكن إلى الآن ما دفعتش الرسوم بسبب العطلة فى المصالح الحكومية». رحلته فى تقديم طلب التقنين، تسببت فى وقف حاله، على حد تعبيره: «من ساعة ما نزل قرار التقنين، وأنا رايح جاى على الطريق، وسايب شغلى، وعيالى، وكل حاجة واقفة بسببه»، وتابع «حسام»: «مفيش حد عاوز يمشى الأمور ويسهل علينا الدنيا، إحنا بنيجى هنا فى الجيزة، بنقف طوابير بالساعات، وفى الآخر يقولوا لنا تعالوا بكرة». وأنهى «حسام» حديثه بنبرة غاضبة: «إحنا بنبى مستقبل عيالنا، عايزين نسيب لهم حاجة يتسندوا عليها لما نموت، وما يبقاش عليها مشاكل».