من أهالى فيصل للمحافظ: «ياريت تزور شارعنا قبل ما تخصصه للتظاهر»
على غرار ساحات الصلاة التى تخصصها المحافظات فى الأعياد، خصّصت محافظة الجيزة ساحات «للتظاهر دون إخطار».. بدا الأمر وكأنه قبلة الحياة لمتظاهرى الإخوان الذين أكدوا أنهم لن يرضخوا لقانون التظاهر، وكعادتها رفضت الجماعة مقترح المحافظة، رافعين شعار «الشارع لنا».
«ساحات التظاهر المباحة والنائية» حل لم يرضِ جميع الأطراف، فشباب الجماعة، سواء فى الجيزة أو القاهرة، رفضوها تماماً: «يعنى هما كانوا زعلانين عشان واخدين إشارة، دلوقتى عادى إننا نترمى فى الصحرا ونبقى راضيين ومرحبين»، قالها معتز ودنان الذى يقطن الهرم ويخرج كل جمعة مع مظاهرات الإخوان فى الجيزة: «يعنى إيه نروح نتحدف فى آخر الدنيا، ويرجعوا يقولوا مش هيتراجعوا عن قانون التظاهر، طب ما هى دى أول خطوة».. «معتز» لا يعرف تحديداً أين هى الساحات التى حددتها المحافظة للمظاهرات، ولم يهتم بالسؤال عنها: «اللى عرفته إنها بعيد جداً، لكن فين، لسه ما اعرفش، وبصراحة مش عايز أعرف عشان مش هتفرق».
ليس الإخوان فقط هم من يرفضون هذه الساحات، ولكن أيضاً «إكرامى» الشاب الذى يقطن فى شارع فيصل هاله تخصيص نهاية فيصل للتظاهر دون إخطار: «هو محافظ الجيزة بينزل فيصل ولّا لأ.. عارف هو أد إيه شارع زحمة والمرور فيه أزمة مستمرة»، «إكرامى» اعتبر قرار المحافظة غير موفق، مؤكداً أنه فى حالة تطبيقه سيحدث كثير من الاشتباكات بين الأهالى والمتظاهرين «دى منطقة أكل عيش لسواقين الأجرة والتكاتك ولو اتعطلوا مش هيرحموا حد».