طوارئ لإنقاذ سائقى «البسكلتات»: لو مش عارف تتصرف.. كلمنا
ركوب الدراجات
لم يعد استخدام الدراجات الهوائية وسيلة للرفاهية أو لممارسة الرياضة، وإنما أصبح استخدامها من قبل البعض كوسيلة نقل أساسية فى الذهاب للعمل أو الجامعة أو المدرسة، خصوصاً بعد انتشار ثقافة ركوب الدراجات، لكونها حلاً لمشكلة الازدحام المرورى، بالإضافة إلى أنها وسيلة صحية وآمنة، الأمر الذى دفع بعض محترفى ركوب الدراجات إلى تأسيس جروب لمنقذى الدراجات الهوائية، بهدف مساعدة سائقيها على الطريق فى حال تعرضهم لأى أعطال، وتعليمهم إصلاح الأعطال التى تظهر لهم على الطرق، ونشر ثقافة ركوب الدراجات بين شريحة كبيرة من المواطنين.
«العجل زيه زى أى وسيلة نقل بيحصل له عطل وممكن محدش يعرف يتعامل معاه لو هو لسه مستجد فى استخدامه، إحنا عاملين جروب وفيه أرقامنا لما حد بيحصل له حاجة بيكلمنا على طول وفى دقايق بنكون عنده، لو فيه صعوبة إننا نوصل له بنقول له يعمل إيه»، بحسب عدنان الأشقر، أحد منقذى الدراجات الهوائية على الطرق، الذى يقدم مساعدته وخبرته فى مجال ركوب الدراجات مجاناً، ويقوم بإنقاذ المبتدئين من خلال الذهاب إليهم فور حدوث عطل، أو بتوجيههم إلى أقرب نقطة إصلاح يوجد فيها أحد المنقذين التابعين له: «لما بروح لأى حد عطلان بفهمه يعمل فى الحالة دى إيه لأن مش طول الوقت أنا هكون متاح لكل الناس».
عدة الإنقاذ: مفتاح بلدى.. سنفرة ناعمة.. سلسيون.. بتشات
عدة الطوارئ التى يستخدمها «مفتاح بلدى 10 و15، سنفرة ناعمة، وسلسيون وبتشات ولافيهات ولانكيهات»، وهى من الضروريات لكل مستخدم حتى يتجنب الأعطال المفاجئة: «هدفى إن الناس تعترف بأهمية العجلة مش مجرد وسيلة للترفيه ولكن دورها كبير سواء فى الرياضة أو تقوية الجسم ده غير أنها ممكن تنجز فى وقت أسرع ومابتلتزمش بأى زحمة زى أى وسيلة».
يسعى منقذو الدراجات للوجود فى أكثر من محافظة الفترة المقبلة: «إحنا دلوقتى فى القاهرة بس فى أكتر الأماكن اللى سكانها بيستخدموا الدراجات زى الزمالك والمهندسين و6 أكتوبر، والفترة الجاية هيكون لينا فى إسكندرية هينوبوا عننا هناك وطبعاً لازم يكون عنده خبرة واحنا بنختاره بعناية»، بحسب أبوبكر خالد، أحد المنقذين، الذى يحاول الوجود دائماً وسريعاً لأحد مستخدمى الدراجات العاطلين على الطرق، وتتنوع الأعطال ما بين توقف الجنزير الحديد للعجلة الذى يعتبر المسئول عن سيرها، وتلف الكاوتش: «المبتدئين بيبقوا فاكرين إن ركوب العجل سهل وحاجة بسيطة وأى حد يقدر يركبه عادى لكن لما بيحصل عطل مبيعرفش يتصرف إزاى»، كما يجمع أرقام هواتف مبتدئى ركوب الدراجات ويقوم بالتواصل معهم باستمرار لضمان صقل خبرتهم وتزويدهم ببعض المعلومات عن الدراجات.