أزواج متعاونون يدعمون حملة «حياتك محطات»: وراء كل «ست عظيمة».. رجل
«عبدالمسيح» وزوجته
دعم الرجل للمرأة، كان من بين المطالبات التى رفعها المجلس القومى للمرأة فى حملته «حياتك محطات.. ماتخليش محطة توقفك»، التى أطلقها داخل بعض المحطات المحورية بمترو الأنفاق، لحث المرأة على السعى وراء أحلامها وتحقيقها، الدعوة التى لاقت صداها بين مئات الرجال، الذين يلعبون فى الواقع أدواراً رئيسية داعمة فى حياة زوجاتهم.
«باسم»: نجاح المرأة يتوقف على مساعدة زوجها.. «أحمد»: لما شعرها وقع قلت لها أنتِ أحلى ست فى الدنيا.. و«عبد المسيح»: الراجل الحنين دعم لزوجته
«عندى قناعة أن نجاح الست يتوقف على مساعدة جوزها وتشجيعه لها لتحقيق طموحها. مش يقول لها مكانك فى البيت، تطبخى وتكنسى، وباشوف دائماً أن الست الشاطرة هى اللى تخرج للشارع تشتغل، وفى نفس الوقت تقدر تدبّر البيت وتربّى الأولاد»، حسب باسم ناشد، مهندس كهرباء، الذى يحاول جاهداً أن يكون داعماً لزوجته «ناهد» منذ أن تزوجا قبل عامين تقريباً.
مديرة بإحدى الشركات، هو المنصب الذى وصلت إليه «ناهد» بدعم من زوجها، فيقول: «كنت باشوف فى عين مراتى الطموح، وإن نفسها تكبر فى مجال السياحة، ساعدتها لحد ما بقت مديرة فى شغلها، وفتحت شركة سياحة فى الغردقة، وأنا اللى خلصت لها الورق». وأشاد بحملة «القومى للمرأة» الأخيرة، مؤكداً أنه كان دائماً وراء زوجته فى كل خطوة تخطوها: «ساعات كنت باسيب شغلى وأساعدها فى إدارة شركتها الجديدة».
حملة «حياتك محطات» يدعمها أحمد الشريف، الذى لعب دوراً مؤثراً أيضاً فى حياة زوجته خلال تجربتها المرضية: «أول ما مراتى جالها سرطان، كانت رافضة تتعالج علشان إمكانياتنا المادية البسيطة، وقتها قُلت لها هتتعالجى فى أحسن مكان، حتى لو هابيع العربية، ولما شعرها وقع كانت بتخبى نفسها منى، كنت دايماً باحضنها وأقول لها انتى أحلى ست أنا شوفتها فى حياتى».
نجاح حملة «القومى للمرأة» يتوقف إلى حد كبير على دعم الرجل للمرأة، حسب «أحمد»، الذى لم يقتصر دعمه لزوجته على رحلة مرضها، إنما ساعدها أيضاً فى تأسيس وإدارة موقع إلكترونى يهتم بشئون الأسرة: «لما كنت باحس أنها بتيجى على شغلها علشان البيت، كنت باقول لها ركزى فى شغلك وأنا هاخلى بالى من الأولاد، كان ممكن أعمل الأكل لحد ما ترجع البيت، وده مش جميل، الست دى ليها فضل عليا، وياما وقفت جنبى، وده دورى تجاهها». خطة مدروسة وضعها عبدالمسيح صبحى وزوجته لإدارة شئون الأسرة: «بقالنا 10 سنين متجوزين، ولما جت تقول لى من 3 سنين إنها عايزة تشتغل، ماعارضتهاش، وساعدتها واتفاجئت بإصرارها ونجاحها فى فترة قليلة جداً»، وفقاً لـ«عبدالمسيح».
يدعو «عبدالمسيح» جميع الأزواج للاستجابة للحملة، ومساندة زوجاتهم فى تحقيق أحلامهن: «الست تقدر تعمل أى حاجة وتنجح فى أى مجال لو الراجل اللى فى حياتها كان حنين وواثق فيها».
«أحمد» وزوجته