مجند سابق: عايز الفريق السيسى يستدعينى تانى عشان نحارب الإرهاب

وقف فى جمعية السلع التموينية للقرية، ممسكاً بشهادة إتمام الخدمة العسكرية الخاصة به، أدى خدمته بأحد معسكرات الدفاع الجوى لمدة 3 سنوات، انتهت فى يونيو 2010، «السيد محمود» 26 سنة، يعمل بالجمعية التى تخدم أكثر من 10 آلاف نسمة بالقرية وما يجاورها من عزب ونجوع، يقول «التفجير ده استهدف الأمن والتاريخ لأن المبنى ده أثرى مش مجرد مبنى للمخابرات، ده كان استراحة لنساء القصر الملكى فى عهد الملك فاروق، والهدف منه هو إرهابنا عشان ماننزلش الاستفتاء أو تجمعات ونفقد الثقة فى الأمن وده مش هيحصل»، وأشار إلى أن الجمعية تضررت من الانفجار وتبعثرت محتوياتها وأصبحت ركاماً. وأضاف السيد «البلد هنا هادية وفيها مظاهرات للإخوان بس بنصدها أول بأول ومش بنسمح إنهم يكملوا تظاهرهم، وهما دلوقتى مش موجودين فى بيوتهم بعد التفجير»، وتابع بقوله أن هذا الحادث لم تشهده القرية من قبل، وأنه بمثابة حافز لهم للوقوف بجوار الأمن فى مواجهة الإرهاب. «السيد» وجد فى نفسه الرغبة لإعادة خدمته العسكرية من جديد، وقال «أنا عايز أوصل رسالة للفريق السيسى أنه يعمل استدعاء لكل الرجالة اللى خلصت خدمة وإحنا نقف معاهم ونشارك فى حماية بلدنا ضد أى إرهاب عايز يعطل الاستفتاء أو خارطة الطريق».