WiFi.. والعيشة مُرة
المكان: جوه الميني باص
المناسبة: الـWiFi
طبعاً عشان التليفزيون وكده فكل واحد قاعد على كُرسي ومفيش حد واقف غير المذيعة وكده :D
المذيعة: حضرتك إيه رأيك في الميني باص الجديد أبو واي فاي؟
الراكب1: حلو جميل بس الأجرة غليت بقت 2.50 هو نازل بقاله قد إيه؟
المذيعة: ده أول يوم النهاردة ؟!!
الراكب1: أصلي افتكرته التاني أبو 2 جنيه ده.
المذيعة: طب إيه رأيك في الواي فاي؟
الراكب1: واي مين؟
المذيعة: واي فاي، يعني تقدر تدخل ع الإنترنت وتفتح الفيس بوك وتويتر وكده.
الراكب1: تعدميني يا بنتي لو أعرف اللي بتقولي عليه ده.
المذيعة: شكرًا لحضرتك، ومعانا أحد الشباب: إزيك وقولنا رأيك في الواي فاي.
الشاب نزل الموبايل من على ودنه وقال: واي مين حضرتك معلش؟!
المذيعة: الواي فاي.
الشاب: تمام حضرتك بتقولي واي فاي يعني يبقي فيه إيه؟
المذيعة: إنترنت.
الشاب: انتي اللي قولتي مش أنا، هو تبع خدمة عملاء TE بطاطا ولا مين؟
المذيعة: طب شايف إن الخدمة تُعمم ؟
الشاب: بقولك أيام سودة !
المذيعة : يعني تُعمم ؟
الشاب :أيااااام سوووودة.
المذيعة: شكراً.
المُذيعة: إيه رأي حضرتك في الميني باص الجديد ؟
الراكب 2: بلا خيبة !!
المذيعة: ليه بس ؟
الراكب 2 يشاور ع الشباك: "حضرتك شايفة مين اللي نايم ع الرصيف جمب الكلاب؟"
المذيعة: آااااه طفل شوارع.
الراكب 2: بتقوليها عادي كده ؟! يعني أطفال الشوارع في زيادة والفقر في زيادة والتعليم زي الزفت وأغلب الشعب جاهل ومش مثقف في الإنترنت ومعهوش موبايلات أصلاً، وكمان بتزوده الأجرة !!! فيه بطالة وفيه قرف وفيه ناس نايمة في الشوارع وناس مش لاقية لُقمة العيش.
وتقوليلي واي فاي وواي بتاع بلا نيلة بلا قرف جتنا خيبة وستين خيبة كمان.
المُذيعة: شكراً شكراً، خلاااااص !!! سعيد كل ده في المونتاج هااااا مش ناقصين.
وراحت لسواق الميني باص
السواق كان بيتصفح الفيس بوك بتاعه
المذيعة: أاااااا
السواق: no connection !!!
المُذيعة: حضرتك إيه اللي بتعمله ده إنت سواق الميني باص ؟
السواق يرمي الموبايل، ويقول: يعني هي الخدمة حلال ليهم وحرام عليا فيه إيه يا ست هانم.
المذيعة: بس المفروض إنك تاخد بالك من الطريق !
السواق: ما أنا واخد بالي وبستخدم 2olak By عشان أشوف الطرق الفاضية وأتجنب الزحمة ;)
مرة واحدة الشاب يصرُخ: النت اشتغل يا جماعة.
السواق: بيجيب الموبايل اللي رماه.
المُذيعة والرُكاب: حااااااااااسب، طخ بوم ترررررررررررر.
الله يرحمهم ويشفيهم، واه يتم إحالة السائق للتحقيق :D