جت في السوستة
علق محمد عبدالغفار، مؤسس مجموعة "جت في السوستة"، على التصريحات التي اعتذر فيها الفنان كريم عبدالعزيز لأعضاء المجموعة بسبب تشابه "الأفيش" الخاص بفيلمه الجديد "نادي الرجال السري"، مع اللوجو الخاص بالمجموعة، وقوله إن هذا التشابه "مجرد توارد أفكار".
وأبدى "عبدالغفار" عدم رضاه عن اعتذار عبدالعزيز، وشارك الخبر الذي نشره موقع "الوطن"، عبر حسابه الشخصي على "فيس بوك"، وقال: "قالك توارد أفكار".
وأضاف: "أنا مش حابب أكبر الموضوع أكتر من كده فعلا.. وعارف أنه ممثل محترم وإنه اتورط بدون علم.. ومن البداية أنا اتكلمت عن سرقة الفكرة لأنها لو في بلد بتحترم الأفكار بتعامل زي سرقة الفلوس بالظبط.. وعلى العموم أنا مش صاحب الجروب لوحدي.. أصحاب الجروب هم كل الأعضاء لو ارتضوا بالاعتذار فأنا ارتضيت".
وأكد مؤسس مجموعة "جت في السوستة" لـ"الوطن"، أنه لا ينوي مقاضاة "عبدالعزيز"، لكنه لم يخفِ أيضًا سخطه مما اعتبره "سرقة الفكرة": "كل واحد مننا بيبقى غيور على فكرته ولما بتتسرق بيحس بغيظ شديد، خاصة إني مؤلف وليا روايات موجودة وحاليا بخلص رواية جديدة، فبحاول قبل ما أشتغل في أي فكرة إني أبحث كتير إذا كانت استهلكت قبل كده أو لا، عشان مسرقش مجهود غيري بمبرر أنا بعتبره سخيف اسمه (توارد الأفكار)".
وأردف: "أنا مقولتش إني مقبلتش الاعتذار، أنا سخرت من التبرير بتاع توارد الأفكار، أنا مسجلتش الاسم واللوجو لأن فيه ناس كتير طلبوا يستخدموه في كافيهات ومحلات جوه وبره مصر، يومها أعلنت إن الاسم واللوجو حلال على كل واحد بياكل عيش طالما هكون سبب في الرزق فأنا مبسوط، ودي مش سرقة أفكار بالنسبة ليا هي دعاية باسم مشهور وبشوفها مشروعة جدا، الفيلم استفزني لأني مؤلف ودي حقوق فكرية، ومش هاخد أي إجراء قانوني طبعا، الدنيا متستحقش إننا نتكلم في موضوع زي ده أكتر من 24 ساعة".
وانتقد "عبدالغفار" مؤلف الفيلم، قائلًا: "أيمن وتار كمؤلف مش بس ابتعد عن موضوع البحث، هو ربط اللوجو بالسرية بالرجال بكلمة العضوية في نحت صارخ للفكرة ومضمونها، ده لو عايز يقول أنا سارقها منكم مش هيعمل كده".
ومحمد عبدالغفار، هو محامٍ مصري عمره 30 عاما، مقيم في دولة الإمارات العربية المتحدة منذ عام 2016، ألَّف روايتي "ثورة محظورة النشر" و"حِلم".
تعليقات الفيسبوك