لأصحاب المزاج العالى: كافيه فى المعادى للموهوبين فى الرسم والغناء

لوحات فنية معلقة على الجدران بشكل يجذب انتباه الزائرين، وفى الخلفية يتعالى صوت أنثوى ناعم يتغنى بـ«كلمونى تانى عنك فكرونى» لكوكب الشرق أم كلثوم، وفى أحد الأركان فرشاة وألوان ولوحات فارغة على استاندات، وكأن المكان جاليرى، لكنه فى الحقيقة كافيه بمنطقة المعادى، قرر صاحبه أن يُخصص فيه جزءاً لممارسة واكتشاف المواهب الفنية فى الرسم والغناء.

يُقسّم الكافيه إلى قسمين، أحدهما يستقبل الرواد يتسامرون معاً، والآخر لأصحاب المواهب التى تجد فى الكافيه مكاناً مناسباً لممارسة موهبة الرسم والغناء، وكذلك إمكانية عرض لوحاتهم فى معرض خاص بالكافيه، الذى سيقام فى يونيو المقبل، ويعتبر فرصة ذهبية للموهوبين لبيع لوحاتهم.

يوفر الكافيه جميع سُبل الراحة للموهوبين، ويقدم لهم مشروبات مجانية: «الكافيه عندنا كبير كفاية، ومقسمينه لقسمين، واحد فيه ترابيزات عادية، والتانى فيه لوحات وفرش وألوان للهواة علشان يرسموا براحتهم»، حسب إسلام محمد، المسئول عن الكافيه: «بنقدّر الفن والناس اللى عندها مواهب مدفونة ومش عارفة تاخد أول خطوة، المكان مش بس بيفتح الباب ليهم ييجوا فى أى وقت، إحنا بنوفر لوحات وفرش وألوان علشان لو حد ناقصه أى أدوات ومش قادر يجيبها، إحنا وفّرنا كل ده، المهم يرسموا ويخرجوا فنهم».

يُحدّد الكافيه موعداً شهرياً لإقامة جاليرى يعرضون فيه اللوحات التى قاموا بإنتاجها، ويحرص «إسلام» على الاحتفاظ ببعض اللوحات الفنية واستخدامها ضمن ديكور الكافيه، وتحمل أسماء أصحابها، تشجيعاً منه على موهبتهم ودعمهم: «مش بس كده المكان كمان بيعمل فقرة كاريوكى لأصحاب المواهب الغنائية، يقدروا يغنوا على أى أغنية يطلبوها من الدى جى، ويشغَّل لهم الموسيقى ويغنوا عليها».

• أم كلثوم
• اكتشاف المواهب الفنية
• الرسم والغناء
• اللوحات الفنية
• المواهب الغنائية
• أم كلثوم
• اكتشاف المواهب الفنية
• الرسم والغناء
• اللوحات الفنية
• المواهب الغنائية