شعار «كرم» فى أعياد الميلاد: «اللحمة للجميع»
عقب صلاة الجمعة تبدأ المسيرة فى انطلاقها من مسجد «المغفرة»، المجاور لمحل عم كرم، لا ينتبه لها الرجل، ويواصل عمله المعتاد أمام ماكينة تقطيع اللحم، تخرج السيدة الأربعينية المحجبة من المسيرة لتسأله: «لحمة الدير جت يا عم كرم؟»، فيرد: «أيوه جت النهارده».. «طب هخلص المسيرة وأعدى عليك». «لحمة دير أبوسيفين»، الاسم الذى حمله «كيس اللحم»، وحملته اللافتة المعلقة على جوانب المحل، «يوجد لحمة الدير».. «الدين لله واللحمة للجميع»، الشعار الذى رفعه عم كرم فى مواجهة غلاء الأسعار، يوضحه: «لحمة الدير دى أنضف لحمة ممكن الناس تاكلها متربية صح وبتاكل علف طبيعى مش أكل من الزبالة زى باقى الغنم اللى فى مصر»، فى المحل الواسع فى منتصف شارع عبدالحميد مكى يقف الرجل الأربعينى ممسكا بساطوره مستعدا لتقطيع اللحمة وتكييسها «اللحمة دى بنبيعها لله ما بناخدش منها ربح واللى جاى منها كله رايح الدير»، إلى جواره تقف صورة العذراء تحتضن المسيح، وخلفه لوحة كبيرة «هذا من فضل ربى»، وعلى واجهة المحل يستقر ملصق الدعاية القديمة لحزب النور «المحل ده عامل زى مصر قادر يجمع كل الأديان، أنا مش فاتح محلى وهكتب عليه للمسيحيين بس وجارى مش هيكتب للمسلمين بس إحنا بلد واحد وروح واحدة».