بالصور| معسكرات الأطفال فى «إجازة نص السنة»: رقص وطبخ وإتيكيت
إحدى الكامبات التى يشارك فيها الأطفال
«رقص شرقى، بالية، فن تشكيلى، طبخ، صلاة».. أنشطة تحرص بعض الأكاديميات التعليمية والتربوية على تنظيمها للأطفال على هيئة كامبات، خلال إجازة نصف العام التى بدأت مبكراً لطلاب التعليم الأساسى، وتعلم الأطفال كيفية استغلال وقت الفراغ وتفجير طاقات الإبداع وتنمية قدراتهم واستثمار مواهبهم الصغيرة، كما تحرص على تعليمهم الإتيكيت وقواعد الذوق العام، وبعض دروس التنمية البشرية، ليصبح الطفل ذا شخصية قيادية قادراً على إدارة نفسه ومعتمداً على ذاته ويفكر بشكل منفصل عن أسرته.
تستقبل إحدى الأكاديميات فى محافظة الأقصر، الأطفال من سن 6 إلى 11 عاماً، خلال إجازتهم القصيرة بنصف العام، تنظم كامبات مختلفة فى مجالات العلوم بتعريفهم بعض الأفكار العلمية وتطبيقها، أما الورش الفنية فتنقسم إلى تعلم الرسم والشغل اليدوى، وكذلك الرقص الشرقى للفتيات، والباليه: «مدة كل نشاط بتكون ما بين 11 و16 ساعة وبيتقسم على 4 أيام مثلاً، وعلى حسب رغبة الطفل هو حابب يتعلم إيه بيشترك فى الورش اللى عايزها»، بحسب مشيرة محسن، مسئولة الأكاديمية، وتعتمد هذه الورش على اختيار أفضل المدربين، لإمكانية التواصل مع الأطفال والقدرة على التعامل معهم: «فترة الأجازة دى بيستغلها أى طفل أنه يقعد على النت، وده بيسحب تركيزهم بيخليهم مايفكروش فى أى حاجة غيره، فعشان نقدر نجذبهم ونبعدهم بعيد عنه مش هييجى غير بحاجات مختلفة زى كده، وكمان بنوفر ورش للبيانو ورقص شرقى للبنات اللى بتحب ترقص، وده بيسعد الأطفال جداً».
تستقبل الصغار من سن 6 إلى 11 عاماً وتعلمهم الاعتماد على النفس
تقدم سارة عبدالوهاب، مدير إحدى الأكاديميات بمنطقة الهرم، ورشاً خاصة بالطبخ للأطفال وتستعين ببعض الشيفات المتخصصات: «فيه بنات صغيرين كتير بيبقى عندها استعداد لدخول المطبخ وبيحبوا يساعدوا أمهاتهم، لكن مابيقدروش ياخدوا الفرصة الكاملة فى البيت، هنا بنخليهم يعملوا أكلات بسيطة تحت إشرافنا ويمارسوا الحاجة اللى بيحبوها ويروحوا ينفذوها»، ومن ضمن الأنشطة التى تقدمها الأكاديمية، تعلم مهارات التعامل مع الآخرين والذوق العام، وكذلك قواعد الإتيكيت: «بنعلم الطفل إزاى يتكلم مع الكبار وإيه الحاجات اللى يتكلموا فيها، عشان لاحظنا أن الأطفال اليومين دول بيتدخلوا فى أى كلام وده غلط، وكمان إزاى يمشوا بطريقة ليدى للبنات، والولاد يمشوا بفخر أو بتقل زى ما بيقولوا»، ويقسم كل نشاط إلى عدد ساعات تقسم على مدار أسبوع كامل: «إحنا كمان اهتمينا فى الكامب إننا نعلمهم الصلاة، بنحفزهم أن أحسن واحد هيؤدى الصلاة صح ده هيكون إمام لباقى زملائه وده بيحفزهم أكتر إنهم يتشجعوا ويصلوا، والمهم فى الكامبات اللى بنعملها أن الطفل بيبقى فخور بالنشاط وبيروحوا يقولوا لأصحابه، وده بيخلى ناس كتير تنضم».