دعوة لتشجيع الزواج: فتيات يتنازلن عن «الجهاز» للتخفيف عن الشباب
دعوة لتشجيع الزواج: فتيات يتنازلن عن «الجهاز» للتخفيف عن الشباب
فى ظل اشتعال الحملات الشبابية التى تنادى بمقاطعة الزواج لارتفاع تكاليفه، قررت الفتيات المتهمات بالمغالاة فى الطلبات، التنازل عن بعض الاحتياجات الأساسية اللازمة لتأسيس عش الزوجية، ومناهضة حملات المقاطعة من خلال التخفيف عن الشباب الذى أضرب عن الزواج بسبب عدم قدرته على تحمل أعبائه المادية.
رانيا محيى، من قرية صان حجر، بمحافظة الشرقية، قررت التمرد على عادات وتقاليد أهل قريتها: «عندنا بيجيبوا من كل حاجة الطاق طاقين، يعنى بدل الغسالة غسالتين والتلاجة اتنين والملايات والمفروشات بالدستة والاتنين، وكل أم أو أب بيتباهوا بحاجة بنتهم، أنا رفضت كل ده واشتريت الحاجة بالواحدة وعلى قد احتياجى وأقل».. راعت «رانيا» الحالة المادية لأهلها وأهل خطيبها، خصوصاً فى ظل ارتفاع الأسعار: «قبل ما أشترى أى حاجة اشترطت عليهم أشترى الحاجات اللى محتاجاها بس، حسبتها بعقلى وقلت هاعمل إيه بالحاجة دى كلها، هتزحم الشقة ومش هاستفيد منها غير المنظرة قدام الناس»، تستاء الفتاة العشرينية من عادات الأهل ومبالغاتهم فى طلبات الزواج: «والله فيه ناس عندنا بتتداين عشان تجيب لبناتها جهاز يتفشخروا بيه قدام الناس وهما أصلاً ماضيين على شيكات ولو ماسددوش ممكن يتسجنوا».
الحال نفسه بالنسبة لـ«نورا عوضين»، من قرية الجنينة بمركز منية النصر، التابعة لمحافظة الدقهلية، والتى تبرأت من العادات القديمة التى تحتم على العريس والعروسة أن يدفعا أموالاً كثيرة فى طلبات ربما لا يستخدمانها لسنوات كثيرة: «أنا طلبت من أهلى مايشيلوش همى، قلت لهم الدنيا غالية وأنا هاشترى حاجات محددة، مثلاً فى أدوات المطبخ اشتريت طقمين حلل بس، وبالنسبة لطلبات العريس استغنيت عن النيش والسفرة لأن تكلفتها مرتفعة واكتفيت بالأساسيات بس».
مؤكدة أنها وخطيبها اتفقا قبل الزواج، على تنظيم حياتهما بالشكل الذى يناسبهما: «ماحدش هيعيش فى البيت ده غيرى أنا وجوزى». من جانبه يقوم السيد الفلاحجى، بقرية ميت تمامة، فى محافظة الدقهلية، بإقامة معرض خيرى بالاتفاق مع أصحاب محال الأجهزة الكهربائية والمفروشات، لتخفيض الأسعار وتقديم عروض للمقبلين على الزواج، من أجل مساعدتهم على تجهيز مسكنهم، والتخلص من العادات التى يتبعها الأهل فى الزواج: «المعرض ده عشان يكون عبرة لكل الناس اللى لسه متمسكة بعادات مالهاش أى لازمة غير أنها فلوس بتترمى فى الأرض، ويبطلوا العادات اللى دايماً جايبانا لورا دى، أهل العريس والعروسة بيفتروا على بعض فى الطلبات ومش عارفين أن كل ده مالوش لازمة».