الخير فى سنترال «مدحت»: «اتكلم واشحن ع النوتة»
لافتات وملصقات وزعها «مدحت» فى السنترال لجذب الزبائن
«مكالماتك بالتقسيط»، شعار رفعه مدحت محمد، صاحب سنترال بالهرم، مستشعراً الأعباء المادية الناتجة عن زيادة أسعار فواتير الهواتف، والظروف المعيشية الصعبة التى يعيشها المواطنون بشكل عام، وفى الوقت نفسه لزيادة الإقبال عليه: «السوق نايم، وبخسر كل يوم، قُلت أشتغل ع النوتة أو بالآجِل، أمشّى حالى وأرضى كمان الزبون».
المحال المجاورة للسنترال كانت تتبع النظام نفسه منذ فترة طويلة، سواء كانت «سوبرماركت» أو صيدلية، لكن «مدحت» أقر نظام «النوتة» منذ 3 أشهر فقط، وأصبح الدفتر لا يفارق مكتبه، يُنظم خاناته كل شهر كالتالى، خانة لاسم العميل، وأخرى للمبلغ الذى يُطالب بسداده: «مش بعمل كده إلا مع أهل الثقة فى الشارع والمنطقة وجيرانى، ولو زبون جديد بجربه الأول».
يستفيد من سنترال «مدحت» كثير من أهالى المنطقة: «باخد منهم الفلوس كل شهر، وبحاول أكون حنيّن معاهم، لأننا أهل وجيران وقلْبنا المفروض يكون على بعض»، ولا يكتفى بتوفير خدمة التقسيط على الشحن والمكالمات، ولكن لصيانة التليفون المحمول أيضاً: «موبايلات الناس بتبوظ أحياناً فى آخر الشهر، ويكونوا مش عاملين حسابهم، وأنا ماشى بمبدأ الرحمة حلوة، ومش بدقّق فى الحساب».
يشعر صاحب السنترال أن «النوتة» سهَّلت عليه كثيراً من الصعاب التى كانت تؤرقه فى عمله: «بعد ما كروت الشحن غليت، الناس بقت تخاف تيجى السنترال، ونظام التقسيط سهّل كتير، ممكن زبون يدفع نُص الفاتورة فى يوم ويكملها بعدين»، ولم يتهرب أحد من دفع حسابه: «عمره ما بيحصل، إلا لو زبون جديد ماعرفوش، الناس فى المنطقة لسَّه بخير، وعندهم أمانة، همّا اللى شجعونى على الفكرة».