«فاتورتا الكهرباء والتليفون كلمة السر».. وقف بطاقات التموين فى أبريل يثير قلق المواطنين

07:57 م | الأحد 03 مارس 2019

«البطاقة غير مستحقة، استهلاك الكهرباء (عالى)، وستتوقف اعتباراً من شهر أبريل، والتظلم على الموقع» جملة مقتضبة أثارت قلق وفزع عدد من المواطنين عندما قرأوها على البون الخاص بصرف حصة الخبز والتموين، فتوجّه بعضهم إلى أقرب مكتب تموين أو «سايبر» للسؤال عن مغزى ومضمون هذه العبارة الغامضة، بعد التحذيرات التى ترددت حول وقف بعض البطاقات غير المستحقة للدعم، وعلموا أن الوزارة منحت المتضررين فرصة لمدة 15 يوماً فقط، تبدأ من أول مارس الحالى، للتقدم بتظلم على وقف البطاقات.

فى أحد أركان مكتبة للأدوات المدرسية بجوار مكتب تموينى فى عين شمس جلس صابر عبدالحليم، ٦٨ عاماً، أمام جهاز كمبيوتر تظهر على شاشته صفحة موقع وزارة التموين الخاصة بالتظلمات ليساعد المواطنين فى إدخال بياناتهم، وقال: «مش أول مرة أعمل تظلمات للناس لأنى فى شهر ٨ اللى فات كنت بحدّث لهم البيانات، والنهارده بدأت التظلمات وبعملها بـ١٠ جنيه للفرد، وأول ما علقت ورق إن فيه تظلمات جالى ناس كتيرة عايزة تتظلم».

عبدالرحمن محمد، طالب بكلية تجارة، مقيم بالقاهرة، تلقى تحذيراً بوقف البطاقة التموينية بسبب فاتورة التليفون، عن هذه الأزمة قال: «أختى كانت بتصرف عيش امبارح وتفاجئت إن البطاقة مكتوب عليها (غير مستحق) بسبب استهلاكنا العالى فى فاتورة التليفون الأرضى، وإحنا ركّبنا الأرضى عشان النت بس وبندفع ٦٠ و٧٠ جنيه أرضى و١٢٠ جنيه نت، ومفيش بيت من غير نت دلوقتى»، مضيفاً أن بطاقتهم تضم ٥ أشخاص هم كل أفراد الأسرة، لذا توجّه إلى مكتب التموين التابع له للبحث عن حل والتقدم بتظلم بعد أن وجد موقع الوزارة لا يعمل، وتابع: «الموقع مابيفتحش من امبارح، واحنا طلع عنينا قبل كده فى حذف الأفراد وتحديث البيانات ودلوقتى هنلف من تانى، مش فاهم إيه علاقة فاتورة التليفون الأرضى والكهرباء بالبطاقة، لأن المفروض إنى لما أزوّد أو أقلل استهلاكى دى حرية شخصية، وأنا بدفع قيمة استهلاك الخدمة».

{long_qoute_1}

مرتدية عباءة وخماراً بسيطاً وقفت نادية فهمى، السيدة الستينية، وسط زحام المواطنين أمام أحد شبابيك مكتب تموين بالمطرية وهى تصرخ فى وجه أحد الموظفين وتطالبهم باستمارة تظلم لمنع وقف بطاقتها بسبب فاتورة الكهرباء، بعد أن علمت من موقع الوزارة بضرورة إحضارها، وبادرتنا بالقول: «اشتريت استمارة تظلم بجنيه من المكتب عشان لما رحت السايبر وفتحت الموقع النهارده طلب منى أجيبها وأملا بياناتى وأنقلها عليه»، مضيفة: «البطاقة فيها ٦ أفراد ومعمولة على عنوان بيتنا القديم فى المطرية وعشان كده الاستهلاك عالى لأن البيت ٧ أدوار على عداد واحد باسم جوزى، فالفاتورة بتيجى بين 700 و900 جنيه، ودلوقتى قاعدين فى شقة وفاتورتنا مابتعديش ١٠٠ جنيه».

إلى جوار «نادية» وقف حميد أحمد، رجل سبعينى، بجلباب بسيط، للاستفسار عن بطاقته المهددة بالتوقف فى شهر أبريل، وبدأ حديثه قائلاً: «بقالى أكتر من شهر البطاقة واقفة تموين، وامبارح اتفاجئت إنها هتقف عيش كمان عشان استهلاك الكهربا عالى»، موضحاً أنه يقيم مع ابنه الوحيد فى شقة صغيرة مكونة من غرفتين فقط، وتابع: «أنا ساكن فى شقة فى شارع المطراوى مفيهاش غير لمبتين بس وبدفع ٦٠ جنيه كهربا، إزاى يكون استهلاكى عالى؟! مش كفاية البطاقة واقفة تموين، كمان هتقف عيش!».

وأوضح مختار عبده، ٤٢ عاماً، مدرس لغة إنجليزية بالإعدادية، ومقيم بالمطرية، أنه فوجئ أثناء صرف حصة العيش ببطاقته التى تضم ٤ أفراد، أنه من غير المستحقين بسبب استهلاك الكهرباء، مضيفاً: «جيت أسأل فى المكتب عن التظلم ومحدش بيفيدنا، وآخر فاتورة كهرباء كانت بـ١٦٠ جنيه، وفى الصيف بتزيد بسبب التكييف، فهل ده يُعتبر استهلاك عالى، لأنه لو كده لازم يفهّمونا عشان نقلل استهلاكنا لأن البطاقة بتوفرلنا كتير».

«بطاقتى هتقف بسبب استهلاك الكهرباء، وأنا قاعدة مع جوزى وعيالى الاتنين فى شقة ٧٠ متر وكلنا بنكون فى أشغالنا طول اليوم وبنرجع بيتنا الساعة ٦ وبننام على الساعة ١٠ بالليل بالكتير»، صرخة أطلقتها أسماء صلاح، الموظفة بأحد القطاعات الحكومية، وتقيم بالأميرية.