إفطار جماعى للسيدات فقط فى مطعم بالحسين

تقوم السيدات بمجهود شاق خلال شهر رمضان، لا ينعمن بالراحة أو الهدوء، طوال اليوم مشغولات بتجهيز موائد الإفطار، وما إن ينتهين منها حتى يدخلن على وجبات السحور، عمل متواصل لا يتوقف إلا مع النوم، وهو ما دفع صاحب مطعم فى منطقة الحسين إلى تخصيص يوم لاستضافة السيدات وأطفالهن، وعمل إفطار جماعى لهن وجولة أثرية، لأخذ قسط من الراحة والترفيه المحرومات منهما.

«تقديراً منا للمجهود اللى بتبذله كل أم وست فى الشهر ده، إحنا خصصنا يوم إفطار للسيدات فقط هيكون يوم ١٣ رمضان، إحنا اللى هنخدِّم عليهم عشان يحسوا بالراحة»، بحسب محمود مصطفى، مسئول المطعم، والذى وجدها فرصة مناسبة لمساعدة السيدات على التقاط الأنفاس، والخروج من جدران المطبخ فى رمضان: «ستات كتير نفسهم ييجى عليهم يوم مايعملوش حاجة، مايحضروش فطار ولا يصحوا عشان السحور، حقهم يرتاحوا شوية، وفى اليوم ده، مش هيعملوا حاجة غير الجلوس والاستعداد لموائد الإفطار العامرة بالأكل».

"محمود": يشمل الأكل والترفيه وجولة فى معالم المنطقة الأثرية

يقدم المطعم ميزة إضافية، وهى أسعار أقل، لجذب الزبائن وإنجاح الفكرة، ويحرص «محمود» على تقديم إنشاد غنائى للحاضرات، كما يشرف المطعم على تنظيم جولة أثرية لهن ولأطفالهن، داخل حى الحسين وشارع المعز وخان الخليلى، والاستمتاع ببعض المناظر التاريخية والأثرية: «هيقضوا معانا يوم مختلف ومش ملتزمين بوقت معين بيروّحوا فيه وقت ما يحبوا اليوم بيخلص لأن ده يومهم».