طلاب ثانوي يرقصون أمام اللجان بعد انتهاء الامتحانات: مفيش أسهل من كده

01:33 م | الاثنين 01 يوليو 2019

سيطرت حالة من السعادة على طلاب الثانوية العامة بشعبتيها الأدبي وعلمي علوم، بعد انتهاء امتحانات العام الدراسي 2018/2019 اليوم، إذ وقف الطلاب أمام مدرسة جمال عبدالناصر للغات في الجيزة، وهم يرقصون على نغمات الأغنيات والطبل البلدي.

واستأجر أحد الطلاب سماعات كبيرة ووقف بجوار سور المدرسة في انتظار خروج باقي الطلاب، وما إنّ خرجوا حتى بدأ الطلاب تشغيل أغنيات المهرجانات، ليرقص الطلاب فرحا بانتهاء الامتحانات.

يوسف شاهين أحد طلاب مدرسة الطلائع الإسلامية، يقول إنّ مادة اللغة الفرنسية جاءت عكس التوقعات: "مكناش متوقعين ختام الامتحانات يكون بالحلاوة دي، الامتحان سهل جدا ومفيهوش تعقيد، حتى القواعد اللي دايما بتيجي صعبة في السنين اللي فاتت جت سهلة جدا، كانوا 36 سؤال منهم 34 اختياري، مفيش أسهل من كده، الحمد لله الامتحان كان في مستوى الطالب المتوسط".

وعن مادة اللغة الألمانية، يقول حمدي أحمد الطالب في مدرسة جمال عبدالناصر الرسمية للغات، إنّ الامتحان كان أسهل من الأعوام السابقة: "سهل جدا ويتحل، الوزارة حبت تفرحنا مع نهاية الامتحانات وجابت امتحان أسهل ما يكون، مكانش فيه حاجة خارجة عن النماذج، كله من النماذج وكتاب الوزارة، كانوا 40 سؤال اللي مش مذاكر يقدر يحل منهم 39 على الأقل".

وجاءت مادة اللغة الإسبانية في مستوى الطالب المتوسط أيضا، كما قالت عبير حسن الطالبة بشعبة علمي رياضة: "الناس كلها خلصت امتحانات علوم وأدبي وإحنا لسه، وده إحساس صعب لكن سهولة الامتحان نستنا إنّ لسه باقي مادة، إحنا طول السنة بنحل حاحات أصعب من كده".