نجل "رزق الله" يروى كواليس تكريم والده في "القاهرة السينمائي": عنده بصيرة
أحمد يوسف شريف رزق الله: تفاجأت من الاستقبال العظيم
يوسف شريف رزق الله
روى أحمد يوسف شريف رزق الله، نجل المدير الفني لمهرجان القاهرة السينمائي الدولي، الراحل، كواليس تكريم والده في الدورة الماضية، من المهرجان.
وكتب "رزق الله" عبر حسابه الشخصي عبر موقع التواصل الاجتماعي فيس بوك: "قبل الدورة اللي فاتت لما عرف قبل حوالي شهر من بداية الدورة اعتزام محمد حفظي تكريمه عن مشواره بمناسبة الدورة الأربعين في تاريخ المهرجان، كان في منتهى السعادة إن بيته اللي فعلًا أفنى فيه عمره هيشكره أخيرًا على مجهوداته دي"، متابعًا: "بلّغني الخبر يوم ما عرف بالتكريم في وجود مامتي ومراتي وحسيت من عينيه قد إيه هو مرتاح ومتحمس للتكريم ده بعد مراحل كتير حس فيها بالإحباط وعدم التقدير الكافي مع إدارات سابقة لدرجة قراره في كذا مرة الاستقالة من منصبه في المهرجان قبل ما يتراجع عن القرار ده".
وأضاف: "قبل افتتاح المهرجان بيوم سألته لو محتاج مني أجهز معه الكلمة اللي هيقولها على المسرح فقال لي إنه ناوي يركز في كلمته على شكر كل الناس اللي ورا الكواليس وبتشتغل معه في المهرجان، فأنا قولت له التكريم ده المفروض معمول عشان الناس كلها تشكرك أنت فمينفعش يتحول لشكرك أنت للناس وخلاص كده"، موضحًا: "كتبت له كلمة تانية يقولها على المسرح وبعتهاله على الميل وقبل ما ننزل نروح الأوبرا تأكدت منه إنه قراها وقالي إنه عمل عليها شوية تعديلات بسيطة وهيستخدمها.. الكلمة كانت مركزة أكتر على مشواره في السينما ومع المهرجان بالإضافة لشوية شكر في النهاية".
وتابع: "لما طلع على المسرح تفاجأت شخصيًا من الاستقبال العظيم اللي الناس استقبلوه بيه مجرد أول ما فهموا من الكلمة الهايلة لمحمد حفظي إن اللي هيتم تكريمه هو يوسف شريف رزق الله وقبل حتى ما يظهر على المسرح.. المسرح كله فجأة قام وقف أول ما دخل على المسرح بخطواته البطيئة الصغيرة وقوبل بعاصفة من التصفيق من كل الناس اللي كانوا فعلاً فرحانين بيه لدرجة إنه هو اللي فضل وبأدبه المعتاد يطلب منهم إنهم يتفضلوا يقعدوا.. لما بدأ يقول كلمته تفاجأت إنه طنش خالص الكلمة اللي كتبتها له وعمل برضه اللي في دماغه وفضل طول ما هو على المسرح يشكر كل فرد في المهرجان واحد واحد وواحدة واحدة باساميهم وكثير منهم مسبوقًا بكلمة أستاذ أو أستاذة رغم إن أغلبهم تلامذته وفي سن أولاده".
واستطرد: "بيني وبين نفسي وهو بيقول كلمته كنت متضايق علشان كنت عايز النور يكون متسلط عليه هو بس في كلمته، وابتديت أتوتر لما لاقيت الكلمة بتاعته ابتدت تطول وكلها شكر شكر وحسيت إن التيمبو في القاعة ابتدى يضعف شوية.. لما خلص التكريم وشفت السعادة على وشوش فريق العمل بتاعه وإحنا خارجين من الحفلة وهما بيتسابقوا إنهم يتصوروا معه أدركت إزاي أنا ضيق الأفق وإزاي هو عنده بصيرة وفهمت ساعتها بس ليه الناس كلها بتحبه بالشكل ده وليه الناس فضلوا واقفين لدقايق يصقفوله وقت تكريمه".
وكان الموت قد غيب عن عالمنا الناقد السينمائي يوسف شريف رزق الله المدير الفني لمهرجان القاهرة السينمائي الدولي، صباح يوم الجمعة الماضية، بعد صراع مع المرض، حيث تستقبل أسرته ومُحبيه واجب العزاء في الفقيد الراحل، مساء اليوم الاثنين، في مسجد عمر مكرم، عقب صلاة المغرب.