حديقة للكلاب فى المقطم: لعب وجرى وتدريبات طاعة

08:45 م | الثلاثاء 16 يوليو 2019

على مساحة 3 آلاف متر، أقام سكان المقطم حديقة للترفيه عن كلابهم بإتاحة الفرصة أمامها للعب فوق النجيلة واستنشاق هواء نقى وتكوين صداقات بين بعضها البعض، بالإضافة إلى إجراء تمارين طاعة لتعديل سلوكيات الكلاب.

أنشأها الأهالى للترفيه عن حيواناتهم وتكوين صداقات فيما بينها

كريم نبيل، 18 عاماً، أحد المساهمين فى تنفيذ الفكرة، يروى أن رحلتهم فى التنفيذ مرت بخطوات متعددة: «فى الأول لاحظنا إن المقطم فيها عدد كبير من الكلاب، أصحابها مش عارفين يفسحوها بسبب الإزعاج اللى بتعمله للسكان، فقررنا نشوف حل يساهم فى توفير مكان لائق صحياً لتجمع الكلاب».

حصل الفريق على تصريح من الشركة المالكة للأرض وتم تخصيصها لإنشاء حديقة للكلاب: «الشركة رحبت جداً، إحنا بنهتم بالحديقة والكلاب، والحديقة بقت مسماة فى المنطقة بحديقة الكلاب، بناخد الكلب يتهوّى ويلعب بالكورة ويدرب على الطاعة، الفكرة بتخدم الناس اللى ما عندهاش مساحات واسعة فى البيت»، وبحسب «كريم» فإن الحديقة تفتح أبوابها لاستقبال الزائرين يومياً: «الحديقة مفتوحة طول الوقت، وبنتهم بيها زى ما بنهتم بالكلاب، بنرشها 4 مرات فى السنة لحماية الكلاب من القوارض والحشرات الضارة خصوصاً فى فصل الصيف». لم يقتصر النشاط فى الحديقة على قضاء أوقات ترفيهية فقط، بل إجراء تدريبات مجانية للكلاب: «فيه كلاب بتدخل مسابقات وبطولات عالمية بتكون محتاجة التدريبات دى».