طريق الألف ميل يبدأ بـنقطة الفرح
طريق الألف ميل يبدأ بـنقطة الفرح
عمله فى مجال البترول لم يمنعه من تحقيق حلمه وأن يصبح رحالة متجولاً بين البلدان، أحمد السمان، استطاع على مدار 7 سنوات ماضية، أن يزور أكثر من 70 مدينة حول العالم، ليتحول من مجرد رحالة بين الدول، لمرشد سياحى ينقل تجربته الشخصية للشباب عن طريق إعطاء بعض الكورسات التى تفيدهم بالسفر: «فى الأول الموضوع جه معايا بالصدفة، كنت بحجز شهر العسل أنا ومراتى لتايلاند وماليزيا، دى كانت أول مرة أسافر وهناك اتعرفت على ثقافات جديدة، وقررت أسافر العالم».
حب «السمان» للسفر جعله يصنع المستحيل حتى يستطيع تجاوز كافة العقبات المالية التى واجهته: «تانى سفرية قمنا بيها كانت بعد 20 يوم من شهر العسل، سافرناها بنقطة الفرح لتركيا، وفى سفرية تانية لإسبانيا سافرتها بفلوس تشطيب شقة واحد صاحبى وقلت له هرجعهالك بعد شهر، وفى السفرية دى تحديداً حسيت إن مجال البترول مش بتاعى أنا مش بحب الشغل الروتينى، وقررت أشتغل فى السياحة مرشد مع الرحلات».
«لف مع السمان» شعار يعبر عن رحلاته برفقة ابنه خلال السبع سنوات: «سافرت 30 دولة معظمها فى أوروبا، وسافرت برضه المغرب وتايلاند وماليزيا والإمارات»، وبحسب قوله فإن الرحلات تركت أثرها بابنه: «ابنى بيتكلم تركى وإنجليزى، وبعض الكلمات اليونانى، ده من تأثير السفر عليه، بقت حاجة مرتبطة بثقافته حتى فى اللعب بيعرف أشكال أعلام الدول».
محاولات «السمان» تجاوز مخاوفه من السفر، استطاع خلال الفترة الأخيرة أن ينقلها للشباب عن طريق تقديمه بعض الكورسات: «بقدم الخدمة دى للشباب من خلال شركات سياحة، بوضح كل حاجة للشباب إزاى تسافر، الميزانية لكل دولة، الطريقة اللى يقدر يؤمِّن بيها نفسه، ميكونش تايه وخايف».
