تحدى الخياطة: 200 قطعة فى نصف ساعة.. وانت مغمض عينيك

09:03 م | السبت 24 أغسطس 2019

أغلق عينيه بإحكام وجلس أمام ماكينة خياطة داخل مصنع ملابس، لخوض تحدٍ من نوع مختلف وهو حياكة 200 جيب بنطلون فى 30 دقيقة، هذا ما فعله نور محمود، لمنافسة أحد زملائه الأكبر منه سناً. بحذر شديد بدأ الشاب صاحب الـ23 عاماً، تحديه مع زميله الذى كان يتهمه دائماً بالبطء فى أداء عمله، وتجمع حوله بقية زملائه فى المصنع لتشجيعه، مستغرقاً وقتاً أقل من المتفق عليه فى إنجاز الكمية المطلوبة منه، دون ارتكاب سوى غلطة واحدة.

«غمضت عينى وبدأت ببطء عشان الإبرة ماتدخلش فى إيدى، وبعد شوية صوابعى عرفت طريقها وسرّعت من أدائى لحد ما خلصت الكمية فى وقت أقل»، قالها «نور»، مؤكداً أنه منذ 4 سنوات، دخل مجال خياطة الملابس الجاهزة، بعد حصوله على دبلوم سياحة وفنادق، مرافقاً أحد أصدقائه فى مهنة خياطة الملابس الجاهزة: «كنت واخد المهنة على أنها شغلانة وخلاص، بس لما عرفت المجال أكتر وشفت ناس بتشتغل فى حاجات أنا مش باعرف أعملها كنت بغير وباحاول أطور من نفسى وأتعلم كتير فى المهنة دى، عشان أعرف أعمل المشروع الخاص بيا بعد كده، أنا مش هافضل صنايعى طول عمرى».

بالتنقل بين المصانع فى مختلف المحافظات، يحاول «نور» التطوير من أدائه فى المهنة التى يقضى فيها أكثر من 16 ساعة عمل خلال اليوم، لسرعة اكتسابه مهارة وخبرة فى مجاله: «طموحى أكبر من إنى أقعد على ماكينة وخلاص، الحمد لله باعرف أفكر وفى وقت صغير بقى عندى خبرة فى المجال اللى باشتغل فيه وممكن أروح محافظات عشان أتعلم جزء جديد فى الشغلانة، ولما أبقى صاحب مشروع أعرف أديره كويس".