حوّل حزنه على تدهور السياحة بصحراء مصر البيضاء إلى طاقة إيجابية، واتجه لدعمها بشتى الطرق، اختيار الصحارى الواقعة فى الواحات البحرية ضمن أجمل 25 مكاناً سياحياً على مستوى العالم دفعه لترويجها سياحياً بين الأجانب، ليرد جزءاً من جميل أهالى محافظة الوادى الجديد عليه.
سامح محمد، مرشد سياحى اشتهر فى مجال السفر الداخلى بمصر بسبب رحلاته للصحراء البيضاء: «الشغلانة دى وارثها أباً عن جد، وقت ما السياحة اتضربت، قلت حرام الجمال ده كله فى بلدى ومحدش بيزوره، قررت أروَّج ليه وأجذب الأجانب من تانى، أبويا متجوز ألمانية، وخالى من فرنساوية وابن عمتى إسبانية، ده كله أيام ما كانت السياحة شغالة، دلوقتى الحال اتضرب».
«كريستالة لكل سائح»، شعار رفعه «سامح» ليربط السائحين بمصر ليعودوا إليها مرة أخرى: «بدّى للسياح وهما مسافرين من مصر قطعة من جبل الكريستال، دى كريستالات طبيعية، الصحراء البيضاء دى كانت عبارة عن بحر زمان وكل حاجة موجودة فيها أحجار طبيعية».
يومياً يقوم «سامح» بإذاعة فيديوهات لايف عبر موقع «فيس بوك» ليجذب السياح الأجانب لزيارة الصحراء البيضاء: «بانشر الفيديوهات على جروبات بره مصر فيها فرنسيين وكوريين وبولنديين وألمان»، وحسب «سامح»، فإن أكثر السياح من الجنسيات الصينية والكورية واليابانية: «إحنا شغالين عليهم حالياً، الرحلة بتتكلف 1850 جنيه، المكان ده بيعتبر أغلى رحلة سفارى فى مصر، فيه بتعدى على الصحراء البيضاء والسوداء وجبل الكريستال والصحراء البيضاء القديمة والعقبات، الأجانب بينبهروا بالمكان، مش متخيلين إنه فيع مكان زى ده على كوكب الأرض».
يحزن «سامح» بسبب عدم اهتمام المصريين بتلك المنطقة: «بتكلم فى فيديوهاتى بحُرقة، علشان حزين على الوضع اللى إحنا فيه، إحنا ما نقلِّش حاجة عن السفارى فى دهب بس محدش مسلَّط الضوء علينا».
تعليقات الفيسبوك