إسماعيل ياسين
قالت سامية شاهين، زوجة المخرج الراحل يس إسماعيل يس، إنها تزوجت بعد وفاة الفنان الكوميدي الراحل إسماعيل يس، فلم تعش معه أو تعاشره، لكنها اعتادت سماع قصة حياته من زوجها.
وأضافت "سامية"، خلال مداخلة هاتفية مع الإعلامي حسام الدين حسين ببرنامج "صباح الورد"، المذاع عبر فضائية "Ten": "زوجي كان بيحكيلي إن إسماعيل يس معاش طفولته زي باقي الأطفال، وكان عامل في الدور الأول في بيته ملاهي لابنه يس، عشان يحققله كل اللي نفسه فيه".
وتابعت: "يس ساعات كان بينزل يلاقي باباه بيلعب في الملاهي تحت لوحده"، موضحة أن والده الفنان إسماعيل يس اعتاد على اصطحابه بشكل دائم أثناء تصويره للأفلام.
وتابعت: "الناس على السوشيال ميديا بينزلوا فتاوي كتيرة عن إسماعيل يس، زي مثلا إنه مات فقير ومش لاقي ياكل، لا إسماعيل يس مماتش فقير، هو مات مستور وأخر شقة كان عايش فيها في الزمالك كانت 7 أوض وصالة".
أما عن حقيقة مرض إسماعيل يس وتراكم الضرائب عليه، فتقول زوجة نجله، إنه كان مريضًا بـ"النقرس"، وأخذت مصالح الضرائب أمواله من البنوك دون علمه، وهو ما تسبب في إصابته بشلل نصفي بعد ذلك، متابعة: "لما راح البنك ملقاش فيه الـ300 ألف جنيه بتوعه، أخدتهم الضرائب وتعب وجاله شلل نصفي".
وأردفت: "إسماعيل يس مكانش بيتسول ومكانش بالشكل اللي بيتحكي عنه على السوشيال ميديا، وفي ناس بتدعي إنها كانت موجودة يوم وفاته، وإنه كان واخد منهم فلوس، لكن مفيش الكلام ده، هو إسماعيل يس جاله اكتئاب بعد وفاة المخرج فطين عبدالوهاب اللي اتوفى قبله بـ10 أيام، وفي يوم بعد ما رجع من إسكندرية كانوا لابسين عشان يخرجوا فاتوفى عند باب الشقة".
تعليقات الفيسبوك