خاص للأيتام ومحدودي الدخل: كروت إعفاء من مصاريف الدروس

07:35 م | الأحد 06 أكتوبر 2019

لا تزال الدروس الخصوصية غولاً ينهش ميزانية الأسرة المصرية دون رحمة، لكن هناك بعض المدرسين من أصحاب القلوب الرحيمة لا يترددون عن مساعدة أولياء الأمور وتخفيف العبء عن كاهلهم، كما فعل الشقيقان «طه وتامر سرحان»، الأول مدرس فلسفة وعلم نفس، والثانى مدرس لغة عربية، واللذان أطلقا مبادرة «كلنا واحد»، بتوزيع كروت إعفاء من مصاريف الدروس على الطلاب غير القادرين.

يقوم الشقيقان بتوزيع الكروت على الأهالى فى المساجد والجمعيات الخيرية، وكذلك مراكز الدروس الخصوصية، كما يتم توزيعها بمعرفتهما على الطلاب متعسرى الحال والأيتام: «الكارت هدفه إننا مانحرجش الطلاب وسط زمايلهم علشان مش بيدفعوا المصاريف زيهم»، حسب «طه»، الذى يستمر فى توزيع الطلاب على المراكز ومجموعات الدروس المختلفة، وفقاً للأماكن القريبة من محل سكنهم: «فيه أولياء أمور وطلبة بتتكسف جداً تقول إنها مش معاها فلوس تدفع للدرس، فى الحالة دى بخلى حد من صحابهم أو الجمعيات الخيرية تتواصل معاهم ويدوهم الكارت المجانى ويحضروا فى أى مكان يحبوه».

الهرم، فيصل، صفط اللبن، 3 مناطق يحرص الشقيقان على تقديم دروس مجانية فيها، بهدف استيعاب أعداد كبيرة من الطلاب غير القادرين: «أنا وأخويا كنا طلبة فى يوم من الأيام وحاسين بالضغط اللى بيبقى فيه أولياء الأمور، وتفكيرهم طول الوقت هنجيب فلوس منين وهنظبط الميزانية ازاى، وعارفين إن فيه ناس بتغصب ولادها مايحضروش دروس فى بعض المواد غصب عنهم عشان مش قادرين يدفعوا». ويتعامل «طه» مع مهنة التدريس على أنها رسالة سامية ومسألة ضمير، ويرفض استغلال وجشع بعض المدرسين برفع الأسعار باستمرار، ويسعى خلال الفترة المقبلة إلى التعاون مع شقيقه على ضم مدرسين آخرين للمبادرة.