المشاركون فى السباق
يعشقون سباقات السيارات، ذللوا جميع العقبات التى تواجههم حتى يتمكنوا من إقامة سباقات بسياراتهم العادية، شريف صاقر، صاحب الفكرة، يقيم سباقات بين الشباب عن طريق استخدام سياراتهم العادية بدلاً من السيارات المخصصة لإقامة السباقات: «السيارات الخاصة بالسباقات سعرها غالى جداً، وأنا باحب رياضة سباق السيارات فحاولت نشر الفكرة بين الشباب».
فى البداية نظم «شريف» سباقات بين الشباب ليختار الأكفأ والأكثر مهارة ليضمه إلى فريقه: «قسمت السيارات لـ3 أنواع حسب قوة الموتور، أول مجموعة لـ1600 سى سى، والثانية لحد 2000، والثالثة لـ2500، واللى حصد المراكز الـ3 الأولى من كل سباق، دخلوا معايا فى الفريق».
وعن طبيعة السباق فهو يعتمد على المهارة والمراوغة بالسيارة أكثر من اعتماده على السرعة: «إحنا بنأجر مكان كبير لإقامة السباق، بنحاول نعدى من الأقماع البلاستيكية بمهارة عالية جداً، وفيه عربيات عادية بتقدر تكسب عربيات خاصة بالسباقات»، يتكون الفريق، حسب «شريف»، من 9 متسابقين: «الواحد بيدخل فى السباق بعربيته، فيه ناس بتكون خايفة، ده سباق والعربية ممكن تتكسر، لكن إحنا بنعمل تمرين بشكل شهرى».
ويقوم الفريق بتأهيل السيارات للسباقات: «نفسنا الرياضة يكون معترف بيها زى سباقات السيارات بالعربيات المعدلة»، ويقوم الفريق بتوفير جميع التدريبات الخاصة بالمبتدئين فى المجال: «بنحاول ننشر الفكرة فى التجمعات الشبابية، فكرة سباقات السيارات مش منتشرة بشكل كبير فى مصر، لكنها ممتعة، إحنا عاوزين ننشرها مِن حبنا فيها».
تعليقات الفيسبوك