مستر إكس عاشق الصبار: ممكن أزرع نبتة فى 15 سنة.. وفى الآخر أبيعها بـ150 جنيه
مستر إكس عاشق الصبار: ممكن أزرع نبتة فى 15 سنة.. وفى الآخر أبيعها بـ150 جنيه
«مستر إكس».. تجذب اللافتة جمهور معرض «زهور الخريف» الذى افتُتح مؤخراً فى حديقة الأورمان، فبعد 40 عاماً من العمل فى مجال زراعة النباتات، اختار مصطفى نصير، هذا الاسم لجناحه داخل المعرض.
«أنا قاصد أسمى نفسى كده، لأن معلم على الناس كلها فى المجال ده، باعمل حاجات محدش غيرى يعملها فى زراعة الصبار، والدليل النباتات والأشكال المختلفة اللى عندى»، قالها «مصطفى»، ٦٧ عاماً، مؤكداً أن لديه شغفاً كبيراً بهذا العمل رغم الخسائر المادية التى تعرّض لها: «كان عندى مزرعة للصبار مساحتها ١٠ فدادين، على طريق مصر السويس، بعد ثورة يناير مباشرة، اتسرق من المزرعة كل حاجة، نباتات وأدوات وسماد، ماسابوش حاجة، المساحة دى كانت تساوى 3 أو 4 مليون جنيه، وفى النهاية، وبعد تدخل الشرطة والأمن اتساومت على إنى أسيبها مقابل 150 ألف جنيه، بعد أكتر من 25 سنة فى زراعتها».
يرفض «مصطفى» استخدام سرادق من القماش فى تغطية جوانب جناحه فى المعرض، كما يفعل بقية المشاركين، ويستخدم نبات صبار طويلاً، كأسوار تحد الجناح من كل جانب: «ممكن أفضل أشتغل فى نبتة صبار أكتر من 15 سنة، وفى النهاية أبيعها بـ150 جنيه، لأن الأمر بالنسبة لى مزاج أكتر من شغل، وفيه ناس كتير حاولت تقلدنى ومش بيعرفوا غير الشركات الكبيرة اللى عندها أدوات متخصّصة، إنما أنا بعون الله باعمل ده بإيدى لوحدى، وعلى سطوح بيتى بعد ما مزرعتى اتسرقت».
يشارك «مصطفى» فى معارض الزهور منذ أكثر من 40 عاماً، وحصل على جوائز فى معارض زهور الربيع، كأحسن عارض عام 2006: «اتعاملت مع ناس كبار كتير، زى يوسف والى، وعاطف عبيد، وغيرهم، كانوا بيقدّرونى، لأنهم شايفين اجتهادى فى التعامل مع النباتات».
