متطوعون فى الحملة داخل أحد المراكب فى الوراق
برودة الطقس التى يشعر بها الصيادون أثناء رحلاتهم النيلة، حمّست بعض الشباب المتطوعين لتوزيع بطاطين عليهم، لمنحهم قدراً من الدفء المحرومين منه. شادى سامى، أحد المتطوعين، قام بصحبة فريقه بتوزيع 200 بطانية على الصيادين فى منطقتى إمبابة وجزيرة الوراق التابعتين لمحافظة الجيزة: «الفكرة جت لنا مع بداية الشتاء، دايماً بنشوف على الكورنيش الصيادين طالعين من بدرى والجو بيكون برد جداً عليهم، وفيه منهم أسر بتكون ساكنة على شط النيل فى عشش وبيوت خشبية وفى المراكب، حبينا نفرّحهم ونسعدهم مع بداية فصل الشتاء».
فى البداية، قام الفريق بحصر عدد الأسر، ليتمكنوا من حساب التكلفة: «وزّعنا 200 بطانية على 150 أسرة، فيه أسر أخدت أكثر من بطانية»، مشاعر الفرحة والسعادة سيطرت على أسر وعائلات الصيادين خلال ذلك اليوم: «دى تانى سنة ننفذ الفكرة، اليوم مش بيكون مقتصر على التوزيع فقط، لكن كمان بنحاول إننا نسعد أطفالهم».
ويتذكر «شادى» أن الفكرة خطرت له أثناء متابعته أحد المراكب النيلية: «نزلت أجرت مركب فى النيل، رُحت جزيرة الوراق، عِشت التجربة وحسيت بيها، ناس عايشين على طول فى المياه، الواحد لما بيتبل فى الشتاء بيصرخ، هما كتير منهم حياته كلها فى مركب». وحسب «شادى»، فإن الحملة بها 50 متطوعاً: «السنة دى هنضيف لتوزيع البطاطين بعض المؤن الغذائية».
تعليقات الفيسبوك