والد إيهاب توفيق.. صديق وسند وأب

11:19 ص | الخميس 09 يناير 2020

للأب مكانة كبيرة في حياة أبنائه، فهو عمود المنزل والمؤثر الكبير في شخصية أولاده، علاقة الفنان إيهاب توفيق مع والده الذي توفي، صباح اليوم الخميس، إثر اندلاع حريق هائل في فيلته بدائرة قسم أول مدينة نصر، لم تختلف عن ذلك، فالابن البكري كان متعلقا بوالده في جميع مراحل حياته.

دور والد إيهاب توفيق في انطلاقته الفنية

وعن دخول إيهاب توفيق الفن صرح والده في لقاء تليفزيوني نادر له، بإنه لم يحاربه ولم يساعده أيضًا على خوض هذا المجال، متابعًا، "هو كان من صغره بيميل للفن، أنا شجعته إنه يكون موسيقي مش مغني لأنه كان بيلعب عود من صغره وهو عنده 8 سنين، والعود ده كان بتاعي لأني كان ليا اهتمامات فنية بعض الشيء، وهو اتعلم مني مبادئ الصوت بس إنما المزيكا لا".

والد إيهاب توفيق يؤدي أغنية لابنه

وخلال اللقاء أدى الأب الخمسيني، جزءا من أغنية ابنه "هدى القمر"، حيث تشابه صوته إلى حد كبير مع صوت نجله الفنان.

وعبر والد الفنان عن حبه الشديد لابنه، "محدش عايز يكون حد أحسن منه غير ابنه، وإيهاب النهاردة الحمدلله بقا أحسن من أي حد تاني".

وتابع أحمد توفيق، "في مطربين كتير بيطلعوا بيظهروا في شريط معين أو حاجة معينة وبعد كده مبتلاقيهومش لأنهم معندهومش خلفية، إنما الدراسة دي أساس الهواية هي اللي بتنميها، وفي ناس كويسين كتير من جيل إيهاب بحب أسمعهم منهم علي الحجار، ومحمد الحلو، ومصطفى قمر، وهاني شاكر، وحميد الشاعري".

إيهاب توفيق بعيون والده: كسول وعنيد

كما كشف أحمد توفيق خلال اللقاء عن أسوأ طِباع نجله الفنان، وهما الكسل والعناد، قائلًا: "هو عنيد جدًا وحتة العند دي ساعات مبتبقاش في مصلحته، يعني ساعات بتكون في حاجة نافعة ليه وبيعاند وبعدين يضيعها، وعنده ده مكتسب من حياته الشخصية مش وراثة".

وعن موهبة إيهاب توفيق، قال والده: "لغاية دلوقتي صوت إيهاب مطلعش، لأنه بيغني الحاجة اللي ماشية مع الشباب أو اللي موجودة في السوق، إنما عشان تسمعه اسمعه على العود وساعتها هتحكم عليه إنه فنان فعًلا ودارس كويس".

وأكمل، أنه يساعد ابنه الفنان في اختيار كلمات الأغنيات الخاصة به معه، مشيرا إلى أن وصف بعض الجماهير لابنه بالغرور يعود إلى عدم معرفتهم به جيدًا، مستكملًا، "لو عاشوا معاه وعرفوه وحسوا بيه هيلاقوه مش مغرور خالص، هو طيب جدًا لدرجة محدش يتصورها، هو بس خجول وقليل الكلام".