مبادرة "مصطفى" لسكان الضاهر: "بكرة استرتش" لتغطية أعمدة الإنارة
بدأ بعمودين أمام مسجد وانتهى بتغطية كل الأعمدة
مصطفى أثناء تغطية أعمدة الإنارة
لم يقف مصطفى عيد، 45 عاما، مكتوف الأيدي أمام أزمة الطقس التي مرّت بها مصر خلال الأيام الماضية، مقرّرا تغطية أعمدة الإنارة في شوارع منطقته الضاهر، لتكون آمنة على المارة، وبدأ بعمودي إنارة يقعان أمام مسجد بالمنطقة حتى لا يتعرّض المصلون أثناء خروجهم من صلاة الجمعة إلى الصعق الكهربائي.
"لما سمعت عن حالات الوفاة بسبب الكهرباء، حطيت نفسي مكانهم، قلت أعمل حاجة أحمي بيها نفسي وجيراني في الشارع".. كلمات مصطفى الذي غطى الأعمدة بأكياس بلاستيك من نوع "استرتش" حتى تلتصق بالعمود ولا تتأثر بمياه الأمطار: "بعد ما خلصت العمودين اللي قدام المسجد، عمّمت التجربة على كل الأعمدة الموجودة بالمنطقة، لقيت جنب المسجد سنتر دروس خصوصية، وبييجي له طلاب كتير، فغطيت الأعمدة اللي قدامه، وهكذا، لحد ما خلصت منطقتي".
فوجئ مصطفى في نهاية يومه بتداول صورة له على الإنترنت أثناء عمله فى تغطية الأعمدة: "وأنا واقف شغال، لقيت صاحبي بيقول لي استنى هاصورك، كنت فاكره بيهزر معايا، مجاش في بالي إنه هينزلها على فيس بوك، وكلمت الأدمن اللي مشير البوست وطلبت منه يمسحه، لأني معملتش كده عشان أتكرم من الناس".
يرى مصطفى أنّه لم يفعل شيئا يستحق عليه التكريم: "كلنا إيد واحدة، اللي يقدر يعمل حاجة ميبخلش، لأن كلنا معرضين للخطر، ومفيش حد معصوم منه"، لافتا إلى أنّه يشجع عمل الخير، خاصة في الأوقات الصعبة: "ياريت الناس كلها تشتغل بالمبدأ ده، وتحاول تساعد غيرها".