أديب عن أزمة كورونا: إحنا في سفينة واحدة.. واقفين جنب بعض ورا حكومتنا

01:10 ص | الأحد 22 مارس 2020

اعتبر الإعلامي عمرو أديب، مواجهة المصريين لأزمة فيروس كورونا، مثل البقاء في سفينة نوح، وأن من يخرق السفينة سيتسبب في غرق الجميع.

وتساءل "أديب"، خلال تقديمه حلقة السبت من برنامج "الحكاية" المذاع عبر فضائية "mbc مصر"، قائلًا: "هل سلوكك كمواطن هيكمل للستر" مضيفًا: "معرفش لأن بيقولك محدش عارف حاجة ومتسألنيش كمان شهرين الوضع هيبقى عامل إزاي لكن الأكيد هو العالم كله وصل لنتيجة إيه".

ونصح "أديب" المواطنين قائلًا: "أقعد في البيت أنت وعيالك ومتخرجش".

وتحدث الإعلامي عن الحالة المستقرة في مصر لمواجهة الفيروس بالنسبة للدول الأخرى: "يا راجل أنت معندكش الآلاف اللي بتموت والتوابيت اللي طالعة كل يوم زي إيطاليا ومعندكش مآسي زي أسبانيا وأنت مشفتش المآسي دي لسه".

وأكد "أديب"، أننا سنعبر جميعًا هذه المرحلة بسلام إذا كان هناك وعي، مطالبًا المواطنين بالحفاظ على الوطن وما تحقق من إنجازات خلال الفترة الأخيرة.

وعن التغييرات التي فعلها فيروس كورونا عالميًا قال "أديب": "لم يعد هناك عدو أو شماتة وأنا شخصيا أتألم لأي حد في تركيا ولأي حد في قطر، وأتالم لأي حد في أي بلد في العالم، ولم يعد هناك مجال لخلافات سياسية، وأحنا بشر وفجأة البشر بصوا حواليهم قالوا أحنا بشر مش بلد لأن اللي حصل حصل للكل".

وتابع: "وقت ما يبقى فيه مشكلة كلنا حجر مرصوص واقفين جنب بعض وواقفين ورا الحكومة بتاعتنا".

وتندر "أديب" عن الحالة التي وصل إليها بعض الدول المتقدمة: "المانيا مينفعش ييجي فيها مخالفة مرور مش وباء والنهاردة أمريكا مفيهاش كمامات وبيقول استعملوا الإيشاربات وترامب بيقول أنا وارث نظام صحي مهترء وقالوا له عاوزين أجهزة تنفس صناعي قالهم على أجهزة التنفس الصناعي أنه جهاز معقد جدا".

واستنكر "أديب" اقتناء البعض للأدوية قائلًا: "أدوية روماتويد ومضادات حيوية اتلمت من السوق" متسائلًا: "هل ناويين أن اللي ينجو هو القادر فقط".

وأضاف: "الشعب لازم يساعد إحنا يا جماعة في سفينة نوح ولو واحد خرمها هتغرق لكن لو واحد حاول يخرمها هنرميه منها وفيه قبطان في السفينة دوره ياخد باله منها أنها تمشي بأمان وسلام".