الطبق الدوار بين الجيران في رمضان.. أكلة هنية تكفي مية
الطبق الدوار بين الجيران في رمضان.. أكلة هنية تكفي مية
يخرج الطبق من باب البيت مملوءاً بأشهى الأكلات أو الحلويات، يحمله أحد أفراد الأسرة، فى الغالب أصغرهم، يذهب لأعلى أو لأسفل، أو إلى الجوار، ثم يعود الطبق مرة أخرى بألذ مما ذهب به.
تبادل الطعام قبل الإفطار، عادة اعتادها الجيران فى رمضان، اختفت مع مرور الزمن، لكنها ظلت متأصلة راسخة فى بعض البيوت، مهما عفا عليها الزمن.
كريمة عيد، من المنيب، اعتادت هى ووالدتها هذه العادة منذ أن كانت صغيرة، حيث كانت ترسلها والدتها إلى جيرانها بأطباق من طعام الإفطار: «ماما بتحب تعمل كده ومش فى رمضان بس، وأخدت العادة دى منها، من يوم ما اتولدت وأنا بشوف أمى كل ما تعمل محشى أو أكلة حلوة بتبقى جارتنا اللى قدامنا ليها نصيب، والعادة دى بتزود المحبة وتقربنا لبعض».
اختفت هذه العادة من المدن، لكنها ظلت قائمة فى المناطق الشعبية والأرياف: «فى المناطق الشعبية الموضوع ده بيحصل كتير وبيبقى فيه ود بين الجيران، غير المدن اللى محدش بيختلط فيها بحد».
يظل الطبق طوال شهر رمضان دائراً بين الجيران، لذلك أُطلق عليه «الطبق الدوّار»، هذا الطبق، تظل ولاء أحمد، تسكن فى شبرا الخيمة، مُحافِظة على دورانه كل شهر، منذ سنوات: «لما بنعمل أكل لازم نودى لبعض وبنرجّع الطبق تانى مليان، زى اللى شفناه فى فيلم عسل أسود، وحب الناس هو سبب إن العادة لسه موجودة لغاية دلوقتى». ستبقى «ولاء» مواظبة على تبادل الطعام مع جيرانها، ولم يمنعها انتشار فيروس كورونا عن ذلك: «لو فيه تأثير هيبقى بسبب الظروف المادية، لأن ليك أكتر من جار، يعنى علشان تعمل حاجة حلوة لازم تكون عامل بزيادة علشان تقدر تبعت».
"بوسى": ربنا بيحط بركة فى الأكل
ورثت بوسى حسين، من بولاق الدكرور، هذه العادة عن أجدادها، وظلت ضمن عادات وتقاليد أسرتها إلى الآن: «لحد دلوقتى عندنا العادة دى، بنتعامل مع بعض زى الأهل بالظبط أى نوع من الأكلات أو الحلويات بنعملها لازم نبعت لكل العمارة، ومش بنخصص جزء معين ليهم واحنا بنطبخ، وربنا بيوضع البركة فى الأكل».
كثرة المشكلات والهموم التى تقع على كاهل الناس، وتغير النفوس والأزمان، أبرز الأسباب وراء ضيق انتشار هذه العادة: «مفيش حد بقى بيودى أكل لجيرانه الأيام دى عشان المشاكل اللى بتلهى وتغير الناس، وكمان الظروف المادية الصعبة».
