صاحب مقهى يفتح "نصبة شاى" أمام لجنة انتخابية بالشرابية
استغل وليد عزت، تزاحم الناخبين للإدلاء بأصواتهم، أمام مدرسة الشهيد الرقيب محمد حسن، في شارع المهمشة بمنطقة الشرابية، وقام بعمل نصبة للشاي والقهوة والمشروبات الساخنة، لخدمة الناخبين أثناء الانتظار بأسعار رخيصة، مستغلاً الحدث فى تحقيق مكسب.
قبل ٤ أيام، استعد "وليد"، لهذه الانتخابات جيدًا وقام بشراء كميات كبيرة من الشاي والسكر والقهوة والنسكافية والأكواب الورقية، لتقديم المشروبات بها بدلاً من الأكواب الزجاجية، لسهولة استخدامها وحفاظاً على صحة الناخبين فى ظل انتشار فيروس كورونا.
"الفترة اللي فاتت كل يوم كنت بنزل اشتري شوية حاجات واجهز لنصبة الشاي دي عشان اخدم على الناخبين اللي نازلين يدلوا بأصواتهم، وعشان استفيد بمكسب في اليومين دول"، قالها "وليد"، مؤكداً أن اسعاره بسيطة حيث يقدم كوب الشاي بـ ٣ جنيهات والقهوة والنسكافية والينسون والنعناع بـ ٥ جنيهات: "قصدت اني اقدم المشروبات باسعار ارخص من القهاوي بره، عشان ابقى قدمت خدمة للناخبين اللي نازلين من بيوتهم وواقفين في الشمس عشان يشاركوا في الانتخابات، هما مش أقل وطنية منى".
بدأ "وليد"، العمل فى هذه النصبة منذ التاسعة صباحاً، بالتزامن مع بدء افتتاح اللجان الانتخابية، ويحرص على غلقها في العاشرة مساءً، بعد غلق اللجان: "الساعة الزيادة دي عشان أقدم لأفراد الأمن والمتطوعين شاي وقهوة عشان تعبهم في الوقفة طول اليوم"، ورغم أنه يمتلك مقهى شعبي، لكنه صمم على افتتاح "نصبة الشاى"، بسبب زيادة دخله خلال يومي الانتخابات: "اللي هعمله في أسبوع في القهوة بتاعتي هعمله هنا جنب اللجنة في يومين الانتخابات".
يحرص "وليد"، على تعقيم أدواته التى يستخدمها وأيضاً يديه، فى ظل ظروف انتشار وباء كورونا، حاملاً معه دائماً زجاجة كحول، يستخدمها باستمرار خلال تعامله مع الناخبين: "برش منها على أيدى وعلى أيديهم، لأن الانتخابات المرة دي ظروفها مختلفة ولازم آخد بالي كويس عشان صحتى وصحة الناخبين، أنا عايز الانتخابات تتم على خير زى كل الانتخابات اللى عدت على مصر".
تعليقات الفيسبوك