القط أثناء عمل الأشعة له
فقد قط شيرازي القدرة على الحركة والإحساس في الجزء الخلفي من جسده، بعد سقوطه من طابق مرتفع، هرول أصحابه إلى العيادات لعمل الأشعات اللازمة، ولكن تكاليف إنقاذه المرتفعة جعلتهم يستعينون ببعض المتخصصين فى جمع تبرعات لإنقاذ الحيوانات، لمحاولة إبقاءه حياً.
وأوضح الدكتور مصطفى حافظ، الطبيب البيطرى المعالج لحالة القط، أنه يحتاج إلى جراحة في خلال 48 ساعة لإبقائه على قيد الحياة: "القط وقع من دور عالي، وجاله كسر في الفقرات القطنية بالعمود الفقري، هيؤدي لشلل في الجزء الخلفي، وعدم القدرة على الحركة والإحساس فيه، وده هايسبب له احتباس بول وامساك على طول، لأن الكسر في المكان ده بيخلي العصب المتحكم في عضلة المثانة والقولون يحصل فيه ضرر، ولما المثانة تمتلئ، مش هاتقدر لا تنقبض ولا تنبسط، وده هيؤدي لاحتباس البول والبراز".
محاولة إنقاذ القط تتلخص في عودة كفاءة المثانة والقولون، ولكن عودته للحركة والمشي باتت مستحيلة: "لو فضل يومين بدون عملية، هيجيله تسمم من احتباس البول والبراز ويموت، كل اللي بنشتغل عليه دلوقتي إننا نحاول نخليه يحس بالمثانة والقولون عشان مايموتش من احتباس البول أو الامساك، وعشان نعرف نحطه على كرسي متحرك بعد كده".
بحسب "مصطفى"، فإن تكلفة علاجه ستكون مرتفعة، وهو ما دفعه بالتنسيق مع صاحب القط إلى جمع تبرعات من خلال أفراد مختصين بذلك، فى محاولة لانقاذه سريعاً: "محتاجين نعمل له أشعة مقطعية وأشعة رنين مغناطيسى، ونجيب الأدوات المستخدمة في العملية والعجينة اللي بتتحط على عموده الفقري، كل ده تكاليفه غالية جداً، فإحنا تواصلنا مع أفراد بتساعد في تبرعات لإنقاذ الحيوانات، وحاولنا كعيادة بيطرية إننا نقلل التكاليف، يعني هانشتري بس الأدوات المستخدمة ومش هايبقى لينا أي مكسب".
تعليقات الفيسبوك