السكان يصنعون مطب صناعي
داخل قرية أبو الغيط بعزبة الشيمي، التابعة لمركز القناطر الخيرية، تقع حوادث سيارات كثيرة، بعضها ينتهي بالوفاة، والبعض ينتهي بإصابات بالغة وعاهات مستديمة، نتيحة تهور السائقين، ووجود طرق غير ممهدة وغير مستاوية، ما دفع أحمد أبو حامد أحد السكان، بالتطوع وعمل مطب صناعي باستخدام الأسمنت، حتى لا تزيد السيارات من سرعتها، ويقلل من الحوادث.
"المنطقة بيحبطها 4 مدارس كلهم ابتدائي، يعني أطفال صغيرين والسوائقين بيمشوا بتهور شديد، ومحدش فيهم بيعمل حساب للأطفال، وحصل أكتر من حادثة في نفس المكان، مرة راجل كبير، ومرة أطفال وكلهم ماتوا"، أسباب دفعت "أحمد"، لعمل المطب الصناعي بالتعاون مع سكان المنطقة، وتم جمع مبلغ 400 جنيه، ثمن بناء المطب بالشارع: "4 بيوت شاركت وكل بيت دفع 100 جنيه يعني تكلفة بسيطة جداً وبالمطب ده هنقدر نحمي نفسنا وولادنا من أن يحصل أي حاجة أو حد يموت لقدر الله".
وبحسب "أحمد"، تم بناء المطب بالأمس، ولم يستغرق ساعة في تنفيذه: "جيراني كانوا مرحبين جداً واللي بنى المطب واحد عامل محار وتطوع بالاجر بتاعه عشان يساعدنا أن الحوادث تقل في الشارع ده".
كان هذا الشارع معروفاً بخطورته وحوادث السيارات المتكررة: "روحت للحي عشان يعمل لنا المطب لكن للأسف مكنش في استجابة وإحنا مش هنسكت على نفسنا أكتر من كده وده خلاني بقيت حريص أن المطب ده يتعمل انهارده قبل بكرة وبالفعل الفلوس اتجمعت في ظرف يومين بالظبط والسكان متحمسين خوفاً على ولادهم وتم بناءه على طول".
وبحسب "أحمد"، فهو دائم التطوع للاعمال الخيرية لخدمة القرية والسكان: "أهل القرية متعودين يقفوا جنب بعض في أي حاجة ودي مش جديدة علينا أننا نتكاتف حتى في المواسم بنجمع دايماً للأسر الفقيرة والشوارع بنسفلتها مع نفسنا بجهودنا الذاتية".
تعليقات الفيسبوك